《小傳日記》雖然油價連跌五日，但環球零售業大佬沃爾瑪噚晚放榜，業績省鏡之餘仲要調高埋出年嘅每股盈利預測，頹咗幾日嘅花旗魚缸三大指數即時醒神晒；道指反彈１８７點，報２３４５８。　　外圍魚缸表現咁好；加上ＱＱ（００７００）周三（１５日）公布省鏡業績，亦被一眾大行同好友眷顧，噚晚港股夜期同ＡＤＲ已經鬼咁省鏡。香江魚缸噚日收復返二萬九關後繼續強勢，今朝一出閘就高開１９３點，再加埋內險一哥平保（０２３１８）亦再次發力，衝破８０蚊關，魚缸最多彈高３２３點，高見２９３４１，再次喺近十年高位插旗。之後兩股略回順，就輪到神州錢莊佬突圍而出，建行（００９３９）同工行（０１３９８）更一度衝前超過３巴仙帶領一眾藍戰士，可惜炒唔高個市。恆指大部分時間都係二百幾點升幅上落，最後埋單升幅更縮水至１８０點，報２９１９９。　　雖然Ａ場呢排冇乜運行，但資金就起勢追Ａ股ＥＴＦ，孖寶（０２８２２）同（０２８２３）分別升逾１﹒４％，而收市國指亦衝前７４點報１１６０８。全日魚缸成交１１９６億銀，較噚日多半成。　＊ＱＱ真風騷平保確係寶，內銀追落後無貨點算好＊　　　雖然缸友一早預咗ＱＱ季績會相當好睇，但勢估唔到嘅係花旗竟然相當進取，開咗個「他屐」天價兼最牛價６０６蚊，即係話以現價計，ＱＱ嘅潛在升幅有超過五成。嘩！噚晚呢位巨無霸喺花旗國預託證券已經率先開齋突破４００蚊關，而香江魚缸今朝一開工，ＱＱ繼續食住個勢上，最新山頂位去到４０５蚊，埋單就升咗近３巴仙，報４０３﹒４銀。　　魚缸熱炒新經濟概念股，但其實只有ＱＱ同閱文（００７７２）值得缸友望多幾眼，其他街坊就真係冇眼睇，手機ＡＰＰ美圖（０１３５７）今年３月喺山頂位２３﹒０５銀插旗之後就極速插水。雖然前排有大摩睇中將佢納入摩指，但依然繼續潛水，今日仲傳話畀基礎投資者京基掟貨，逆市續插近兩巴仙，報１１﹒１銀。　　搞電子支付產品嘅百富環球（００３２７）發盈警話全年會起碼少賺四成，缸友收到風急急腳掟貨散水，全日最多跣低１２巴仙，低見３﹒５６銀創超過三年半新低，埋單跌咗超過１１巴仙，報３﹒６銀。佢阿媽高陽科技（００８１８）冇咁重傷，跌近半成，報１﹒６銀。　＊百富發盈警質低難避免，本周最叻叻友邦冠藍戰＊　　　平保早排獲瑞信睇好，「他屐」由７８蚊大幅剷高９６蚊，加上「孖屐」繼續憧憬分拆旗下嘅網上金融平台「陸金所」上市；隻股全日彈高超過１巴仙，報７８﹒８５銀，仲曾經喺８０﹒２５銀最新山頂位插旗，實在厲害！　　ＡＩＡ（０１２９９）之前獲瑞信維持「掃貨」評級，「他屐」就畀７１銀不變，收市時踢高近１巴仙，報６５﹒９銀，全個禮拜就升咗７巴仙，為全場最勁藍戰士。請鼓掌！　　四大中資錢莊今日大發神威，建行升咗近２巴仙，報６﹒８１銀；農行（０１２８８）跟升近１巴仙，報３﹒６２銀；工行亦唔輸蝕，全日剷高逾２巴仙，報６﹒１９銀；中行（０３９８８）埋單時升咗不足１巴仙，報３﹒７８銀。　　招行（０３９６８）表現喺所有街坊入面一向最出位，升嘅時候一定跑喺最前，跌嘅時候肯定墊底，今日埋單一共升咗超過３巴仙，報３１﹒３銀！　＊水泥也錯峰埋鑊真輕鬆，靛藍星濠亮缸邊炒個瘋＊　　　神州四川水泥熟料生產線自１１月６日起就全線錯峰生產喇，即係唔生產住，仲要有足足三個月咁多，有望「有序壓減產能，最大限度實現減排」咁話喎，令一班神州水泥佬狀態大勇，水泥一哥海螺（００９１４）愈升愈有，結果佢全日一共升咗逾４巴仙，埋單３５﹒０５銀，仲曾經喺３６蚊超過六年高位插旗，勁！　　創新高嘅又點止海螺，仲有中材（０１８９３）同埋中建材（０３３２３），中材跟住個大市一共踢高逾３巴仙，埋單５﹒９７銀，同樣喺超過六年高位６﹒１１銀插旗；中建材亦飛高逾３巴仙，埋單７﹒２８銀，全日仲曾經喺７﹒４４銀超過兩年高位插旗添，實在可喜可賀！　＊易鑫再震落逼近招股價，粉絲心傷透無花亦無假＊　　　靛藍星（０８３７３）雖然只係超購１﹒６倍，但呢隻創板半新丁呢期攞晒彩，噚日首日入缸就爆升４７巴仙，今日都好西利，彈高咗近３９巴仙，報１﹒２２銀，高招股價六毫子超過一倍，以每手５０００股計，仲未沽貨嘅缸友每賺３１００蚊。勁！　　同期入缸嘅創板魚毛仲有濠亮環球（０８１１８），首日開齋已爆升一倍，今日更係繼續發力，跳起四成半，報０﹒８７銀，高招股價三毫子１﹒９倍，未散水嘅缸友每手８０００股賺４５６０蚊。　　缸友瘋狂掃貨超購５６０倍嘅易鑫（０２８５８），入缸前一日暗盤都升咗超過四成，正當缸友以為可以延續閱文（００７７２）神話再賺多Ｄ浸時候，原來已經中咗伏，噚日頭一日掛牌只係升咗半成多Ｄ。今日嘅表現仲要同大市完全唱反調，最多跣低近４巴仙，低見７﹒８銀，距離招股價７﹒７銀只係一步之遙，埋單計跌咗超過３巴仙，報７﹒８７銀，以每手５００股計，計盡只係賺８５蚊；再計真Ｄ，仲要輸利息兼使費呀……假期愉快，請請！　　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新etnet健康網購，送你【健骨維他命D3(1000IU)】乙樽(價值$108)► 立即行動！