加入最愛專欄  收藏文章 

2019-11-07

【監倉生活】如果返工是無期徒刑,社會變化所帶來的,是多判你一次終身監禁!

  失咗蹤成個月,全因為我經歷左一個慘無人道、不見天日嘅瘋狂peak season,令我完全冇時間同大家分享返工點滴。(唔好意思,就算冇人想知,我都要迫大家知)到左今個月,終於早返少少收工,但行出office大樓一刻起,突然覺得「其實收咗工我咪又係行去另一個監獄入面」。

 

  新加坡近排積極研究興建地下城,以解決地面土地不足嘅問題。如果新加坡地下城嘅技術真係成熟咗,香港絕對可以向佢哋借鏡,將全港嘅辦公大樓放晒落地底!原因好簡單,辦公室大樓呢啲黑洞,當你入咗去,冇深夜都唔使旨意行得返出嚟!既然喺入面做嘢嘅人都不見天日,咁又洗乜將辦公室放喺地面呢?加上,打工仔不嬲都係奴隸嚟架啦,唔落地底幫地面上面班有錢人搵錢,你仲有咩價值可言?

 

 

  係咪聽到都唔希望自己有朝一日會成為地下囚,怕做嘢做死咗都冇人知呢?但偏偏正處於地面嘅各位香港人就同監犯無異!日日工作至深夜,收工一刻終於可以享受僅餘嘅自由時光?唔好玩啦!你望清楚香港四周!搭巴士又隨時要食催淚彈、搭港鐵又日日提早停止服務,你想去邊都去唔到啦!算喇,我行路!幾經辛苦行咗幾條街去到銅鑼灣,呢間又話提早last order、嗰間又話深黃深藍唔入得,最終得返幾間可以揀嘅餐廳,但又排到2046都唔到你,你想輕鬆下食餐好嘅機會都冇埋。

 

 

  當你原本擁有嘅行走自由、消費自由甚至任何言論自由都消失咗,香港就正式成為死城。你嘅生活模式變成按人哋嘅劇本去走:每日走入小監獄進行勞動進貢;指定時間收工由小監獄走到大監獄;再有規則規限住各位喺大監獄放飯及休憩嘅時間;最後,就寢時間再迫大家返監房倉為第二日勞動休息作準備。返工,對於香港人嚟講已經係一個好殘忍、要坐一世嘅監獄;再加上社會嘅變化,等於判一個已背負無期徒刑嘅打工仔另一次嘅終身監禁。

 

  唔講政治,但相信大家都想呢個病咗嘅城市快啲變返好,畀我地一班原本已經受盡苦難嘅「奴工」,可以過返啲屬於人嘅生活。有邊個唔想自己嘅「家」可以安定、繁榮地發展落去呢?

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多花生味辦公室文章
你可能感興趣
#OL #辦公室貼士 #打工仔 #職場 #監獄 #地下城
編輯推介
即時報價
全文搜索
Search
最近搜看
雙幣交易
財政預算案2024-25
More
Share