愈來愈多政界人士使用社交媒體呢把雙面刃去接觸群眾！面對「萬惡」嘅Facebook同Instagram，睇來我哋嘅新任特首林鄭月娥已經迷上咗佢哋！林鄭一上任就急不及待咁開咗個Facebook專頁同埋ig帳號喇，第一個Post就係同網友分享佢整「妝」待發去宣誓嘅一刻，同拍埋片開心Share，十足十時下「港女」會做嘅事，睇嚟林太都有一份「少女心」呀吓！林太而家都出咗幾個Post喇，暫時以Jenny所見，Like係多過嬲嘅，希望佢可以Keep住啦。

 

 

Fb同ig有得留言 暫時Like係多過嬲

 

 　　前特首CY曾經都有叫林太開Facebook同大家交流交流，結果當時林太話怕Facebook嘅討論唔理性，直接餵咗個檸檬畀CY，最後好多官員都開咗，佢都決定唔開。

 

　　不過，事情總有例外，林鄭競選特首期間，一直畀人批評同市民（尤其是網民同年青人）溝通不足，社交媒體的宣傳攻勢一直落後另一個候選人、前財爺曾俊華(John Tsang)，於是林鄭把心一橫，決定開返個Facebook。就係咁，佢先發覺玩Facebook「其實唔難」！好似Jenny教媽媽上網咁，佢都係一學就識，Easy Job！

 

　　林太上任之後又命人即刻開多個專頁再大你一個ig帳號，仲極速咁拎埋「藍剔認證」（Facebook用來證明個專頁已得本人/公司認證），仲可以留言，比CY大方幾多呀！ 可見林太已經開竅，明白以社交接觸普羅大眾同埋收集輿情嘅作用。Facebook都唔係咁得人驚啫，係咪？

 

 

「上帝」也留言 開埋Snapchat就更Connect

 

　　而且好明顯呢位負責林太fb嘅小編，對玩社交媒體嘅熟練程度，高過前特首嗰個「關公」馮煒光都唔知幾多班啦！連網絡紅人「上帝」都即日喺林太Icon張相到留言「I love you Carrie」，再加多個心心添！以後林太可以喺fb同「上帝」對話了！

 

　　咁Jenny好期待林太以後可以出多啲Post，同大家有多啲互動，咁新聞都唔使吓吓咁嚴肅。不過負責管理嗰位小編可能礙於林太身份，Facebook同ig啲Post仲係有少少……悶同Old School咁。Jenny同相熟嘅行家都覺得新專頁有相有片，不過啲Post用嘅文字就仲係好有個種政府新聞處發放資訊嘅感覺，Jenny唔求佢好似John Tsang玩到咁「出神入化」，但如果內容可以活潑有趣、「貼地」啲，加多少少生活照就更好，可以拉近返同市民嘅距離吖嘛！

 

　　Jenny仲有個額外建議，如果林太真係想Connect後生仔，就要開埋Snapchat啦！皆因而家好多後生仔都好少玩Facebook啦，梁特時代嘅年輕人仲好熱衷玩Facebook，但而家佢哋多數已經轉咗去玩Instagram同埋Snapchat，而且Snapchat嘅Post 24小時之後就消失，仲可以知道邊個Cap圖添！唔知呢啲功能對林太嚟講係唔係好新奇方便呢？搵日試吓玩吖，Jenny可以教你㗎，Call我吖！

 

「關閉專員」值2000大元

 

　　喺呢度，Jenny提提大家，呢個新專頁與林太之前喺競選時開嘅「林鄭辦公室」唔係同一個嚟，大家要睇清楚呀！而且Jenny收到風，林太打算係下年3月尾先至關閉「林鄭辦公室」呢個專頁，聽講仲請埋專人操刀！而且「專頁關閉費」仲有成兩千蚊添！唔知林太請到「關閉專員」未呢？未嘅話可以考慮下我Jenny喎！

 

　　講開又講，成個政府入面，Facebook年資最深的應該係「財爺」陳茂波，2008年Facebook喺全球開放註冊冇耐佢已經開始玩。而講「識玩」前立法會議員鍾樹根Facebook嘅新小編亦係高手。之但係，玩得幾叻都冇用，似乎都幫唔到提升佢哋嘅民望，所以計我話，玩社交媒體固然重要，識得做實事更重要，兩個都做到就簡直係「神人」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇