收藏文章 

2017-07-21

「謎語成」又出山林鄭原是「黑天鵝」?琼子竟然係「姐姐」?

  書展嚟到第三日啦!噚日就有林鄭同大家一齊行書展,今日就由商務及經濟發展局局長邱騰華同政制及內地事務局局長聶德權分上下晝落場。前立法會主席曾鈺成都嚟埋一份,去咗書展嘅一個對談會,吹水嘅同時推銷一吓佢嘅新書!同屬民記嘅琼子冇新書出,就主攻細路市場去講故仔,但佢同小朋友自稱「星星姐姐」呢吓,Jenny差啲將手上盒飲品噴出來。
 
800字要啱啱好 多一個字都No
 
  曾(前)主席仲邀請咗民主思路嘅黃梓謙(Gary)一齊做嘉賓,佢哋一開場就互笠高帽,曾生一嚟就讚Gary論述能力強、思路又清晰;Gary又讚曾生好有修養,係佢學習嘅榜樣添喎!Jenny心諗:夠喇!兩位頂帽由頭笠到落腳趾尾喇!題外話,曾(前)主席話佢冇做主席好耐,所以Jenny都係改口叫返佢曾生好。


  入返正題,曾生話,叫佢寫文唔難,叫佢定題目同埋主題就考起。唔少學生怕寫長文,曾生就反其道而行,覺得寫短文仲難!佢好自信咁同大家講,而家自己寫專欄嘅時候會規定自己寫足800字,係不多不少啱啱好800字!聽到呢度,Jenny覺得佢好似小妹一個強逼症朋友仔,自問真係做唔到佢咁分毫不差!

「謎語成」繼續出題,人物性格冇矛盾!

 

「謎語成」又嚟料 林鄭所得支持少?


  曾生有個花名叫「謎語成」,好多人都想知個由來,嗱!雖則佢講嘢模棱兩可得滯,成日令人搲晒頭,但呢個並唔係原因。佢同Jenny講,當日佢「抄考」咗一個美國作家嘅「玩法」,人地喺佢嘅專欄入邊寫咗三個數字,叫人估邊個做美國總統。佢咪又試吓喺專欄玩吓囉,等人去估之後邊個做特首,從此「謎語成」個名就不脛而走。Jenny記得吖!佢篇文一出,結果人人估到嘔,行家就係嗰時開始係咁叫佢呢個花名。


  講起估特首,曾生話其實覺得林太都係好似特朗普咁,係一隻「黑天鵝」!佢同Jenny講,「有邊個喺佢參選嘅時候估到佢會做特首呢?咁佢仲唔係「黑天鵝」?」之但係,當時好多人都覺得林太有中央嘅「加持」,可以成功當選㗎噃……點解你會覺得佢係「黑天鵝」呀?曾生你又畀謎語Jenny估喇?放過小妹吧!


小朋友,乖,叫「姐姐」啦!

 

琼子派糖細路笑 叫「姐姐」就免了


  轉個頭民記主席琼子就出現喺書展講故仔比小朋友聽,佢叫啲小朋友稱呼自己做「星星姐姐」,因為佢個英文名叫Starry,又好鍾意星星同埋猩猩喎!Jenny心諗,唔好玩啦!琼子你都做咗人哋媽咪啦喎,係唔係叫「星星媽咪」比較貼切呀?又或者叫Auntie Starry都好吖!

 

  Well,「星星姐姐」今日講嘅故事就係《木偶奇遇記》呢個大家耳熟能詳嘅故事,不過就講得有啲窒吓窒吓咁,唔通佢唔記得咗個故仔講啲乜?不過唔緊要,佢非常識做咁攞咗一啲糖果出嚟派比小朋友,小朋友見到糖就開心晒啦,仲點會理佢講故仔好唔好聽吖!Jenny望住呢一幕,就不禁想起我哋個政府施政,何嘗唔係咁樣?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#木偶奇遇記 #星星媽咪 #星星姐姐 #派糖 #曾鈺成 #黑天鵝 #謎語成
編輯推介
即時報價
全文搜索
Search
最近搜看
雙幣交易
財政預算案2024-25
More
Share