收藏文章 

2017-07-24

劉怡翔笑容秒殺同學仔 楊潤雄「鄺神」上身係因為......

  「洛克」星期日掃過香港,打咗一個早上嘅風,原本Jenny行咗幾日書展都夠皮,不過聽聞書商加推優惠,今日又有兩位局長嚟書展同一班年輕人吹吹水,Jenny當然唔會放過任何八卦同購物嘅好機會。朝早睇住財經事務及庫務局局長劉怡翔以笑容秒殺「唔識死」同學仔,下晝就到教育局局長楊潤雄拎住本《你的名字》「鄺神」上身,但死都唔肯講「副局的名字」。書展果然係個好地方!

  

劉局長今日全程都Keep住招牌紳士笑容,同學仔講錯嘢?唔駛驚喎!

 

 o靚仔唔識死 話局長上咗年紀

  

  劉怡翔局長本身係新政府咁多位司局長入面年紀最大嘅,不過Jenny幾時都話年齡嗰個數字係冇意義嘅,最緊要心境夠Young,Right?劉局長活到老學到老,而家尤其對創意產業、智能技術發展嘅嘢有興趣!梗係啦,Fintech發展一日千里,做財庫局揸Fit人點可以唔緊貼潮流? 想當年電腦啱啱普及,劉局長已經走在潮流尖端,決定大學去讀電腦,幾有前瞻性呀!Jenny覺得,創科局局長楊偉雄可以同劉局長多啲交流,咁就相得益彰喇!

 

  年齡呢方面,男人一向比女性看得開,就好似今日有位年輕人「唔識死」向局長推薦咗本關於記憶嘅書,話呢本書好適合一啲上咗年紀嘅人士鍛鍊吓記憶。嗱!嗱!嗱!小朋友你咁講,係咪想話局長老先?換轉係Jenny我一定黑你面。同學仔講到一半都好似Feel到自己「瀨嘢」,講講吓口都窒埋;不過望望劉局長聽咗之後個樣,依然Keep住一個招牌紳士笑容! Jenny真係替呢位同學仔抹一把汗呀!


  劉局長仲話自己都好鍾意旅遊,因為可以對呢個世界認識多啲,了解唔同國家嘅風土文化之餘,又可以感受吓大自然嘅神奇喎!順手推薦大家要去加拿大黃刀鎮睇極光喎!皆因嗰度睇到極光嘅「命中率」有成80%,唔似挪威、冰島咁難撞見!果然係財庫局局長,計好晒條數,但求不浪費時間與金錢。

  

楊局長都鍾意睇愛情小說,真係估你唔到!

 

一個問題 青春回憶返晒嚟?

 

  歌仔都有得唱:「如果,命運能選擇......」下晝現身嘅教育局局長楊潤雄就推薦《The Paradox of Choice》(中譯:選擇的悖論)畀一班後生仔睇,佢介紹嗰陣話:「有時愈多選擇就愈唔開心」。咦?楊局長你呢句說話係唔係有咩弦外之音呢?咁有選擇定冇選擇好先?楊局長即刻兜返:「有選擇一定比冇選擇好」,之但係都要取決於當事人點樣睇呢件事喎!楊局長冇辜負佢資深AO嘅出身,講嘢有咁玄得咁玄,帶住Jenny同成班行家齊齊遊咗轉大花園。


  遊完大花園,楊局長就真人終於落場行咗個圏。佢話自己睇書睇得好雜,連特首林鄭睇開嘅愛情小說都有睇喎!行行下仲拎起《你的名字。》嘅中文版小說,話想買返屋企睇!不過,Jenny同在旁嘅記者朋友就想睇「副局的名字」多啲囉!


  大家都估唔到楊局長鍾意睇愛情小說,有同學仔好叻咁「食住上」問佢中學時期有冇一啲青春回憶係難以忘記嘅呢?局長畀呢個突如其來一問殺個措手不及,定一定神之後,「鄺神」上身,好感性咁講咗句「每一個回憶都係美好嘅!」,尤其係工作咗之後就更加有呢種體會,然後笑笑口咁講:「而家我唔小心講錯一句話都好大件事!」睇來,局長都經歷過唔少愛在心裏口難開嘅時候噃!

 

局長呀!局長!你話我知副局的名字啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#書展 #副局長 #楊潤雄 #你的名字。 #教育局 #劉怡翔 #財庫局 #你的名字 #選擇的悖論 #秒殺 #青春回憶 #北極光 #旅遊 #副局的名字
編輯推介
即時報價
全文搜索
Search
最近搜看
監管風暴
透視大灣區
More
Share