過往專欄

2017-07-25

那個在西九龍總站的「中租界」

#一地兩檢 #一國兩制 #立法會 #基本法 #湯家驊 #雙非孕婦 #李家超 #袁國強

　　高鐵「一地兩檢」一直以來都係一個政治大炸彈，梁振英政府嗰5年咩都唔得人心嘅政策玩齊，係得「一地兩檢」從來只聞樓梯響，就知呢壇嘢有幾咁棘手，偏偏林鄭月娥上場搞完教育新資源後，第二波就係解決「一地兩檢」呢個燙手山芋，真係小測未做已要大考。

放心！行咗出路軌唔會打你，但會拉你啊！

被租走了的那三層

　　成個方案係點，Jenny 唔再喺度講多次，各位讀者可以去返Etnet新聞版面睇，而係咁多日以來小妹從不同渠道收返嚟嘅風，雖然歷史背景等等都好唔同，但因為「租賃」一詞，加上入面會行內地法律，仲包埋刑事法，就令人總覺得高鐵西九龍總站地底嗰幾層儼然就係一個「中國租界」，成件事好似時光倒流去《上海灘》年代咁，但今日沒有許文強、只有袁國強；沒有馮程程、只有陳帆兄。

　　Jenny諗諗吓，高鐵車箱歸內地管，雙非孕婦就冇得借啲意利用高鐵「衝閘」嚕！之不過，Jenny留意到西九龍站以外的所有鐵路設施、路軌和隧道，都唔係「內地口岸區」。如果有人離開高鐵車廂範圍進入路軌，好似周星馳套《九品芝麻官》入面個方唐鏡咁，「我跳出、我又跳入！」咁，咪好好笑？律政司司長袁國強就話，呢個情況幾乎冇可能發生，因為路軌條隙好窄，行唔到人㗎。保安局局長李家超就話，就算有人咁做，政府就會當佢非法入境者。噢！咁都係跳返入去先喇！唔好唔畀我玩FB就得。

　　袁國強多次強調今次「一地兩檢」唔會違反基本法，又唔會損害一國兩制，總之就No Problem啦！小妹不是法律的專才，對於技術性嘅法律問題，只可以請教高人，或者睇書深造。只係Jenny我問咗唔少律師朋友，又睇咗唔少訪問，發覺當中最具「啟發性」嘅應該都係湯家驊(Ronny)嘅文章同訪問喇！皆因佢身為大律師，當年立法會有關高鐵撥款嗰時，佢擔當住一個從法律角度出發質詢政府嘅角色，而今時今日卻完美示範「打倒昨日的我」。Jenny不由得嘆句，人類嘅智慧發展真係一日千里啊！

Ronny的啟發

　　人太有記性有時真係唔係好事，等Jenny在此又同大家回一回帶。2010年時任嘅立法會議員湯家驊力數「一地兩檢」所帶來嘅問題， Jenny搵返當年立法會嘅會議記錄，原文抄錄當時Ronny係咁講嘅，「主席，剛才有一位同事說「一地兩檢」的問題，只是關乎《基本法》第22條，其實這是錯誤的。主席，因為其實《基本法》第14條說得很清楚，香港特區政府是要負責香港的社會治安；......第16條說明香港政府是負起行政管理權，在區內負起行政管理權；第18條規定香港法律 ......香港特區只可以實行香港法律。......主席，其實你說在香港市中心進行「一地兩檢」，在憲法上根本完全是沒可能的。你在邊境進行是可行的，但在市中心進行，我就看不到為何可行。」