收藏文章 

2017-08-02

蔡若蓮氣場勁 發展局三兄弟老友鬼鬼

   噚日先公布完首批嘅副局同政助名單,今日有幾位就正式返工喇!第一日返工當然要蒲一蒲頭、上一上鏡嘅,畀各位傳媒認識認識!所以今朝特首一講完嘢,教育局、發展局同埋勞福局就輪流出嚟打返個靚卡喇!

 

 

正所謂:「男女授受不親」,所以兩位見記者時冇搭膊頭合照。

 

蔡若蓮氣場勁 楊潤雄都企定定

 

  今次教育局副局長蔡若蓮係最多爭議聲嗰個,教協嗰邊噚日一知道,即刻嘈到拆天。不過唔緊要,特首林鄭都知惡搞㗎喇,所以今朝「特別關照」蔡副局,見傳媒時都主動幫佢講盡好說話!林鄭嗰頭見完記者,蔡副局就同楊潤雄局長一齊現身,嘩!佢行出嚟見傳媒嘅時候,個氣場仲勁過行喺佢前面嘅楊局長呀!咁又係嘅,蔡女士話晒都做過校長吖嘛!慣咗帶住壓場感出席學校早會,相反楊局長政府出身,個樣又咁溫文,氣場係爭咗啲嘅。

 

一睇就知發展局呢三位係好「巴打」啦!

 

發展局三兄弟老友鬼鬼

 

  緊接住就係發展局出場喇!局長黃偉綸一出到嚟就好開心咁搭住副局廖振新(CS)同埋政助馮英倫(Allen)嘅膊頭影相,笑到見牙唔見眼!仲勁興奮咁同大家講佢個局終於齊人,真係等到「望穿秋水」!後來AllenJenny講,原來局長一直好想有個暑假陪吓屋企人,而家終於有個副局幫手睇住個檔口,唔使走去麻煩隔離局嘅局長幫手署理,可以去旅行都去得安心喇!下個星期局長就會飛去渡假喇,係新任副局嘅第一個考驗。

 

 Casper今次好彩有羅局長幫你解圍咋,下次記得做功課喇!

 

勞福副局唔知最低工資?

 

  大家睇上面張相佢哋係咪好Friend呢?唔講唔知大家記唔得記,噚日Jenny先提過勞福局新副局徐英偉(Casper)係民建聯底,而勞福局局長羅致光就係民主黨出身,嘩!呢次真係世紀合作喇!

 

  而羅局長入咗政府之後都幾關照啲細噃,事關今日有記者就問徐副局知唔知而家最低工資係幾多,仲話「這是常識吧?」,殺徐副局一個措手不及,一時之間口啞啞,只能夠繼續背已準備好嘅講稿應對,而記者當然咬住唔放,結果就疊晒聲。Jenny都聽得幾辛苦,淨隱約聽到徐副局話會留意呀、落區呀、努力呀……Jenny就緊係同一眾行家就企埋一邊食花生啦!羅局長見勢色不對,笑笑口咁同徐副局解圍,話徐副局都係返咗幾個鐘頭工啫,就算係佢自己都會一時間記唔起綜援個金額數字,仲反問返記者記唔記得小童嘅綜援基本金額係幾多。嗱!局長,最低工資幾多真係常識嚟㗎!同綜援基本金額不可同日而語噃!徐副局,下次見記者,記得做功課喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多言歸政傳文章
你可能感興趣
#最低工資 #副局長 #政治助理 #政助 #霸氣 #常識
編輯推介
即時報價
全文搜索
Search
最近搜看
恒大困局
透視大灣區
More
Share