收藏文章 

2017-09-08

香港女多男少點算好?北上尋夫新出路?

  香港男女失衡,女多男少嘅情況相信大家都唔係第一日聽啦!統計處最新推算仲估呢個情況會加劇。不過明明喺香港,男性比女性少,男仔應該好吃香先啱,但係仲係有咁多兵仔同娘娘,Jenny身邊的男性朋友就日日呻「無女」,真係搲爆頭都諗唔明。最後諗來諗去Jenny覺得有位好姊妹講得非常中Point:「男人少,好男人更少。女人多,壞女人更多!」。

 

統計處都係女多男少?

 
姊弟戀OOK


    
今日政府統計處就公布新嘅人口推算數字,就咁睇真係嚇死你!因為男女失衡的情況去到50年之後將會更加嚴重,由而家1000個女性對925個男性減少至800個男性,Jenny真係要幫咁多位未有着落嘅姊妹們講句「Oh My God!」喇!


  只不過,大家唔駛擔心住,負責匯報今次數據嘅統計處副處長陳萃如就同Jenny解釋返,其實只不過係因為女性嘅平均壽命比較長,其實喺25歲以下嘅年齡組別來講,男性嘅數目仍然係比較多嘅!所以一眾姊妹唔使擔心,只要你哋唔介意姊弟戀,都可以考慮一下「小鮮肉」們㗎!心態成熟比年齡更重要嘛!

 

香港女性與內地男性結婚嘅比率逐年上升!


時移世易 北望神州有驚喜
 
  
仲有另一個方法,就係北上尋夫喇!而家祖國發展咁強盛,唔少男士都有才又有財!加上內地同香港就掉轉,一孩政策同埋男尊女卑嘅傳統諗法之下,內地一直男多過女,內地男士想搵異性伴侶可謂費盡心思,據小妹駐上海工作嘅姊妹講,有時內地男士追女仔時,比香港男士更捨得花心思同埋使錢,不過依然成日食檸檬(梗係由我呢位好姊妹餵啦!)


  
副處長都話,其實而家香港女性與內地男性結婚嘅比率逐年上升,唔再係只有香港男性北上搵老婆,女性都可以北上搵老公!仲話因為女性北上搵老公嘅比率高左,連帶單程證嘅來港人數預計都會逐年下降添!你知啦!香港女性雖然Open mind,但內裏仍然有「嫁雞隨雞」嘅諗法都唔出奇,但係咁喎,想娶北方佳麗嘅男性都係會繼續娶㗎啦,而且唔少內地男士都好深情㗎,願意隨愛妻來港。所以對副處長呢個講法Jenny真係諗唔通噃!

 

AY封盤了,娥姐點算!

 

  講起男女問題,Jenny就醒起立法會男神之一,得閒上吓電視講兩性關係嘅公民黨嘅黨魁楊岳橋(AY)今日宣布就喺歐洲結咗婚,正式封盤了!而家男神又少一位,咁多位姐妹(尤其係娥姐!)記住抹乾眼淚,繼續加油尋找下一位啦!Jenny都係呢度祝AY新婚快樂,百年好合啦!如果擺酒,記得請埋你位螢幕情人娥姐啊!

 

AY今日正式成為老襯!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多言歸政傳文章
你可能感興趣
#兩性關係 #Sex & Relationship #女多男少 #男女失衡 #小鮮肉 #統計處 #兵仔 #娘娘 #北上尋夫 #北望神州 #中港婚姻 #嫁雞隨雞 #單程證 #北上 #楊岳橋 #擺酒
編輯推介
即時報價
全文搜索
Search
最近搜看
中概股回歸
大國博弈
More
Share