收藏文章 

2017-09-27

學生壓力已爆煲 誰聽少年心底夢?

  青春本來係去探索去冒險嘅好年華,但近日接連聽到有年青人輕生,總係令人不勝唏噓。好多人會問:「點解佢哋有勇氣死,冇勇氣面對?」Jenny可以話畀你知,千祈唔好再講呢啲說話,隨時弄巧反拙!

 

 

 

壓力偏高 抑鬱就到

 

  喺香港生活壓力大似乎已經係「常識」,由細到大煩考試、煩升學、煩畢業搵工、煩儲錢買樓,樣樣嘢都要煩。抑鬱已經有年輕化嘅趨勢,青協今日就發表咗關於學生情緒嘅調查,發現有超過一半受訪學生出現抑鬱嘅表徵,你話得唔得人驚?

 

  身邊嘅朋友不時都同Jenny呻壓力好大,好驚會有抑鬱症。之不過,壓力大到抑鬱呢樣嘢已經唔單只係成年人嘅問題,而家唔少後生仔女都會遇上。

 

  好似今日青協就做咗個有關學生情緒嘅調查,以便利抽樣自填問卷形式訪問咗3441名中學生同大專生,結果有差唔多四成人自評新學年的壓力指數偏高,比起上年同期嘅28﹒7%多咗一成;又發現超過一半即51%受訪學生出現抑鬱情緒表徵!Jenny好認同青協所講,雖然唔可以單憑結果去判斷受訪者係唔係已患上抑鬱症,但係情況真係好應該關注。

 

講多錯多 不如唔講好過

 

  不過相信唔少人都會問,佢唔肯同我講,我點知佢係唔係唔開心呢?又或者我知道佢唔開心,但係唔識點安慰佢咁點算呢?青協嘅全健思維中心督導主任徐小曼就教大家面對子女、朋友唔開心嗰時應該點樣回應喇!

 

  所謂如果講多錯多,不如唔講好過。調查入面問到後生仔女最想聽到人哋點回應呢?原來啲人最想聽到「如果你有需要,隨時搵我」、「你唔開心,我陪你吖」同埋「雖然我未必完全明白你,但我會願意聽」。證明好多時候同一個唔開心嘅人講大道理係冇用架!

 

  咁佢哋又最憎人地點答呢?嗱!呢句:「剩係識喊,有咩用?」可以話同推佢哋入深淵冇分別!;「我都唔明你有咩唔開心,好小事啫」都好乞人憎架、「有人仲慘過你啦」嘩!聽到呢句Jenny真係會想打人!如果畀小妹揀的話,我最唔想聽嘅就係「吳得掂」嗰句:「一有唔舒服佢哋就頂唔順;呢個係其中一點,點解生涯規劃教育咁重要」。

 

心理影響生理 切忌收埋唔理

 

  徐小曼同Jenny講,其實好多學生出現情緒困擾嗰陣,都唔會直接表達,所以身邊嘅人,要留意下佢哋有冇抑鬱及焦慮情緒情況,好似對一向感興趣嘅活動提不起勁、成日返學或者考試前都嗌頭痛、肚痛、身體唔舒服等等。佢仲提醒大家,避免去否定學生嘅情緒,即係嗰啲「好小事啫」、「有人仲慘啦!」等等嘅用字,如果唔係學生可能加劇掩飾同隱藏自己嘅情緒。Jenny都覺得係,到爆發嗰時,可能已經係最後一念,咁就真係後悔都冇用喇!

 

  所以各位讀者,如果觀察到身邊有人(或者自己)Keep住散發負面情緒,甚至影響到日常生活,試吓聽吓佢哋有咩唔開心,或者搵人傾吓,同埋最重要尋求專業人士協助,唔好收收埋埋呀!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#輕生 #壓力 #抑鬱症 #精神健康 #學生情緒 #青協 #安慰 #聆聽 #生涯規劃 #心理情緒 #專業人士 #爆發
編輯推介
即時報價
全文搜索
Search
最近搜看
雙幣交易
大國博弈
More
Share