過往專欄

2017-09-29

林鄭上任3個月Chur到爆外訪有成25日

#外訪 #張建宗 #次數 #統計 #陳茂波 #袁國強 #林鄭月娥 #試用期 #上京 #特首

　　自從前任教育局局長吳克儉嘅外訪次數之多，令佢奪得「旅遊局長」嘅稱號之後，唔少人都對政府一眾官員嘅外訪數字好有興趣。適逢今個星期日就係10月1日，亦即係新一屆政府啱啱過「試用期」嘅時候，Jenny就同大家一齊嚟睇吓呢三個月特首同咁多位司局長外訪過幾多次啦!

林鄭就出晒名勤力，上京見王主任同去英國，同樣都是4日來回!

3個月、9次、25日

　　特首林鄭就出晒名勤力，所以佢嘅外訪紀錄就係最多，有成9次外訪，足足去咗25日!嘩!咁咪平均每個月要出去3次？Jenny真係覺得好羨慕，但又戥佢辛苦。你知喇，搭得多飛機其實都幾攰，不過原來林鄭多數都係返大陸，有啲仲係即日來回，就算係去英國都係去4日咁大把(齋搭飛機都冇咗兩日喇!)，睇嚟特首真係好上心，樣樣都親力親為，就算外訪都想拿拿臨返香港主持大局！

行政長官林鄭月娥7至9月外訪日期、地點及日數一覽:

日期	地點	日數
8月2日-5日	新加坡及泰國	4日
8月6日-9日	北京	4日
8月18日	澳門	1日
8月22日-23日	上海及杭州	2日
8月26日-28日	天津	3日
8月31日	深圳	1日
9月14日-17日	緬甸	4日
9月20日-23日	英國	4日
9月24日-25日	長沙	2日

張建宗要睇檔　冇咩時間去外訪

　　至於「一打呔就興奮」嘅政務司司長張建宗，原來上任以嚟只係外訪過兩次！仲要次次都係喺廣東省即日來回。Jenny就估:應該係因為特首成日要外訪，佢要做署理行政長官睇住個檔口？你睇佢8月25日去完廣州，林鄭第二日就要去天津，司長就算想住多晚都唔得喇！

政務司司長張建宗7至9月外訪日期、地點及日數一覽:

日期	地點	日數
7月28日	中山	1日
8月25日	廣州	1日

波叔出外三司中最多　強哥外訪喺第一個

　　雖然林鄭即使遠赴英國都剩係用咗4日，咁Chur嘅行程應該唔係個個都頂得順，咁單次外訪去咗最多日係邊個呢？就係財政司司長陳茂波(波叔)啦！佢7月去咗德國6日，要出席二十國集團領導人峰會。而且佢嘅外訪次數暫時就係三個司長入面最多，去咗4次總共16日，不過呢啲數字同特首比都係小兒科啦！

　　正所謂「世界這麼大，我想去看看」。咁新班子入面，最早有得出去「看看」嘅又係邊位呢？登登登凳~竟然係律政司司長袁國強！佢喺新政府上場後第二日(7月2日)就飛咗去奧地利，出席聯合國嘅國際貿易法委員會大會。除此之外，佢仲返過兩次大陸，外訪次數不過不失。

財政司司長陳茂波7至9月外訪日期、地點及日數一覽:

日期	地點	日數
7月5日-10日	德國	6日
7月25日-27日	印尼	3日
8月6日-9日	北京(陪同特首)	3日
8月21日-24日	武漢、長沙及鄭州	4日