上個星期Jenny同大家睇完「十大傑青」，今個星期就有港大民意研究計劃嘅「十大政團」半年結出爐，分別就政團嘅認知度同埋支持度評分，Jenny今日就同大家一齊睇睇呢份成績表係點啦！皆因呢個都係選舉贏面嘅指標之一！

 

政團嘅認知度同埋支持度評分，都係選舉贏面嘅指標之一！

 

老牌政黨冇得排頭位

 

　　未睇結果之前，Jenny原本估呢兩個評分，應該係老牌政黨抱攬，由泛民及建制兩大陣營、都係「民」字頭嘅民建聯同埋民主黨排頭位卦？港大先喺第一階段嘅提名期，問市民「最認識果（嗰）十個政治團體既（嘅）名稱」，果然係立法會第一大黨民建聯排第一，叫得出佢哋個名嘅受訪者有成65﹒9%，仲係咁多個政團入面唯一一個有6字頭嘅添！而民主黨都緊追其後，有59﹒5%；跟住就有公民黨、自由黨、工聯會、社民連、新民黨、人民力量、工黨、熱血公民、街工及青年新政，合共12位「佳麗」通過咗提名期。

 

　　嚟到第二階段，雖然係問支持度，但由於受訪者唔同咗，都要睇返佢哋對12位「佳麗」嘅認知度嘅！最低嗰兩個就要被踢出「十大」，結果街工同工黨竟然「十大」不入，不敵呢排官非纏身嘅青年新政，同埋立場較激嘅熱血公民，Jenny真係完全R晒頭！

 

「公民黨」無啦啦做「一哥」？

 

　　而支持度個結果又係點呢？第一位雖然都係有個「民」字，不過就係「公民黨」，得分係47分；第二位為工聯會，得46分；自由黨下降兩位至第三位，得45﹒7分。而立法會兩大政黨民建聯同民主黨，就排到去第6同第5。呢個結果亦令小妹大跌眼鏡！

 

　　公民黨係出咗名嘅「律師黨」，「律師」呢兩個字就係加分因素？自由黨就由上年嘅第三，去到今年上半年做到「一哥」，而家又落返第三。Jenny即係諗起家燕姐首《皆大歡喜》都有得唱「人面對高低得失少不免～震震震震震～人生起跌似戲一場～登登登登登～」有時呢啲評分，真係估佢唔到嘅！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇