收藏文章 

2017-11-08

何翠萍履新三日仲未慣 冇抽閱文因怕申報煩

  今日立法會開始就《施政報告》嘅致謝議案辯論,Jenny當然要一早返到立法會坐定定聽會喇!今日亦都撞正係財爺嘅政治助理何翠萍(Apple),轉工之後第一次跟財爺嚟立法會大會。以前做開傳媒嘅Apple,而家身份轉換咗,唔知感覺如何呢?Jenny梗係要幫大家八吓啦!

 

 

小妹嘅攝影技術都唔錯㗎!

 

Apple仍在太空浮游中?

 

  Apple話晒都係前商台一姐,同行家談笑風生自然零難度!Apple 話今日先第三日返工,自己仲有少少「如在太空浮游中」嘅感覺,因為話晒做咗成21年傳媒人,轉眼間角色就唔同咗,好多嘢要重新適應,仲講笑咁話自己係「年紀大嘅新鮮人」,畀人知道年齡嘅秘密冇所謂,但就有少少怕人地知佢:「原來做咗咁耐傳媒喇!」。雖然好唔慣,但佢大讚財政司司長辦公室嘅同事都好體諒佢,畀咗唔少Support佢。

 

冇抽閱文因怕申報煩

 

  今日財經界熱話一定係閱文(00772)爆升,Jenny同財經記者出身Apple都有傾起。喂!Apple有冇抽返手先?Apple話,做咗呢個位,咩都唔好買就最自由,皆因申報程序實在煩死人。仲不忘分享下投資心得,告戒散戶見到熱爆新股都唔好隨便用孖展,投資要量力而為。

 

  傾傾吓,Apple拎起手上本筆記簿遮嚟遮去,點解嘅?原來係因為Apple今日第一日喺立法會蒲頭,唔少攝記大哥都要追住佢影相想立此存照。不過Apple以前開慣咪、見慣鏡頭㗎噃!做咩忽然怕醜?Apple就同Jenny講,因為以前見到鏡頭時都係有心理準備自己係做緊嘢,但係今日係同大家傾傾吓偈,無啦啦被鏡頭對住,硬係有啲奇奇怪怪咁,所以覺得好尷尬,唔知點好……女人始終係愛美嘅,Jenny當然明白,影相當然愈靚愈好啦!Apple深明大家始終都要交差,最後都肯畀大家影相,不過就有個小小要求,就係「唔好影得我咁師奶噃!」Apple你點影都唔會似師奶,放心啦!

 

Cova出品嘅雜錦Tart!係好食嘅!

 

波叔今日心情靚 請食Cova真係正

 

  講開又講,唔知係咪Apple終於埋位,「等到頸都長」嘅財爺波叔今日心情非常靚!下午茶時間請記者食Cova出品嘅雜錦Tart!仲係由Apple親手拎出嚟添!財爺波叔又點睇Apple呢?波叔就大讚Apple佢返咗幾日工,表現醒神又勤力,猛話「十分滿意」!波叔既然請到個咁滿意嘅助手,就梗係要請大家食好嘢,與眾同樂啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#閱文 #熱爆 #新股 #量力而為 #孖展 #何翠萍 #立法會 #陳茂波 #政助 #返新工 #COVA
編輯推介
即時報價
全文搜索
Search
最近搜看
雙幣交易
財政預算案2024-25
More
Share