立法會補選3月就舉行喇，而家都已經11月啦，Jenny就一早收到風建制喺各區會派邊啲候選人出戰，就好似九龍西有富二代之星鄭泳舜、新界東有民記工記力谷嘅鄧家彪（阿Bill）、港島就有蠢蠢欲動嘅葉劉愛將陳家珮（Judy），功能組別更加唔使講，上次連任失敗嘅謝偉銓講到明會去馬。反觀泛民呢？Jenny就真係R晒頭，事關離選舉淨返4個月，仲未見到泛民有張明顯嘅名單出爐，連Jenny都覺得有啲唔耐煩喇！

 

 

早於學民年代周庭已經活躍媒體前，如果今次當選就會成為立會史上最後生嘅議員。(周庭facebook圖片)

 

泛民初選計分制有變 大黨玩晒？

 

　　近排Jenny聽到行家耳語，話泛民初選嘅計分制有變，而新計分制被人質疑係「益大黨」。原來係因為本身個計分方式係用「55方案」，即係電話民調同民間投票分數各佔50%，而家就有人建議變成「442方案」，電話民調同民間投票分數各佔40%，淨低嗰20%就由非建制派立法會議員同埋所屬直選選區嘅區議員投票評分。

 

　　如果係咁，Jenny都覺得咁真係好易畀大黨「玩晒」噃！尤其係喺九龍西坐擁一堆樁腳嘅民主黨同埋民協，咁樣嘅話，即使同樣係被DQ嘅議員之一嘅「游BB」想出選或搵人代出選，都應該會好蝕底。

 

周庭倘出戰港島勝算大

 

　　而港島呢邊，噚日爆出醜聞嘅香港眾志，今日又有新聞喇！Jenny收到消息話眾志已經敲定由「學民女神」周庭出戰港島，拎返羅冠聰失落嗰一席。不過周庭到而家仲未有回應，如果係堅嘅，根據返泛民之前嘅講法，睇嚟都唔會有第二個人選同「女神」爭喇！

 

　　工黨嘅郭永健（細孖）就同Jenny講，對於補選佢哋會持開放態度，又話泛民初步已經有共識，被DQ嗰四個位會畀原先嘅政黨同政團優先出戰，唔會貿然插手，所以周庭如果真係出戰港島，佢都覺得呢位小妹妹勝算好大，因為基本上支持泛民嘅票都會落喺佢身上。至於梁游嘅新界東同埋九龍西席位，佢就話泛民應該有一輪初選先。但係你知啦，有選舉就有是非噃，淨係上文講嗰個計分制都夠麻煩啦！

 

　　細孖就話，點都好，最緊要唔好鬼打鬼，因為團結先事成。Jenny就覺得細孖你嘅主觀願望係好嘅……之不過，人心險惡世事難料啊！後生仔！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇