收藏文章 

2017-12-27

林鄭血壓有少少高 唔會被「嬲嬲」影響自己

  大家覺得每日應該瞓幾多個鐘先叫做有足夠睡眠呢?有人話6個鐘、有人話8個鐘,計Jenny話,梗係瞓6粒鐘以上,瞓得又熟又甜就最好喇!你知喇,睡眠係女人最好嘅美容方法嚟㗎嘛!咁唔知身為「香港第一女性」嘅特首林鄭月娥,一日又瞓幾多個鐘呢?

 

 

(設計對白)

 

日睡5粒鐘《施政報告》前夕再少啲

 

  大家唔使估,皆因今日林鄭自己就喺電台自爆咗個答案出嚟啦!佢話一日24小時,除咗瞓覺之外都係做緊嘢。至於瞓幾多個鐘?答案竟然係得5小時!難怪之前林生都呻過佢「黐線㗎」、「兩點幾喇喂」(都仲未瞓)喇!林鄭仲話,喺發表《施政報告》前夕瞓得仲少,得3至4個鐘!不過佢都知作為特首,點可以畀人覺得自己好「頹」呢?所以如果太累,都會減少工作多啲休息嘅!

 

  林鄭話,自己好鍾意工作,仲鍾意將啲行程塞到密密麻麻,咁樣先可以有效咁運用時間喎!難怪Jenny成日喺啲活動想搵林鄭回應幾句,佢都急急腳咁走,皆因又要趕下場!

 

定期做體檢 無時間做運動

 

  講完睡眠時間,林鄭亦都自爆埋自己「有少少血壓高」,有食藥控制,仲強調自己都好關心健康,會定期做Body Check;不過就冇咩時間做運動,同埋有3、4年冇同屋企人去旅行喇!所以就趁今個聖誕同屋企人去個短Trip放鬆吓。Jenny都覺得,放假叉叉電,係好事嚟呀!

 

  除咗生活作息,林鄭仲講埋佢而家對Facebook嘅睇法噃!Jenny仲記得,當初林鄭都幾抗拒開Facebook,林鄭都解釋返係因為唔鍾意宣傳自己;但係而家做咗特首,市民都想知道佢嘅生活,所以都係決定開返個專頁嚟同大家交流一下。至發現原來玩Facebook「都好容易」、「難不到自己」!仲話有諗過喺發表《施政報告》後「開Live」直播回應網民提問,不過啲同事話「有保留」就冇搞喇!

 

  林鄭參選時,曾被對手曾俊華(薯片叔叔)笑過「嬲嬲多到上個鼻」,開Live會唔會怕遇上負評呢?林鄭話一於無有怕,仲話自己已經習慣,唔會被啲負評影響自己嘅心情:「自己問心無愧,係為社會做事就得喇」!不過佢都承認,培養呢種平靜的心態需要時間,自己都係呢幾年先學識咋!

 

  培養平靜嘅心態又談何容易?Jenny都要向林鄭好好學習。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#林鄭月娥 #睡眠 #施政報告 #特首 #血壓高 #睡眠時間 #體檢 #做運動
編輯推介
即時報價
全文搜索
Search
最近搜看
雙幣交易
聚焦兩會2024
More
Share