收藏文章 

2018-01-19

民主黨撐咖哩飯面和心不和?沈大師會唔會「燈」咗「維園阿哥」?

  建制派早已各就各位,民主派緊係要急起直追先得啦!噚日港島區有香港眾志嘅周庭報完名之後,今朝就輪到范國威(咖哩飯)報名喇!

 

 

就咁睇都幾團結㗎!

 

  之前一直有傳咖哩飯喺政壇人緣唔多好,Jenny仲聽聞就算佢贏咗初選,同佢有「牙齒印」嘅民主大黨都唔會幫佢手宣傳。只不過今日Jenny都見到各大民主派政黨都有派人到場支持,講真嗰下都幾「十派士」,皆因民主黨嘅代表仲係佢哋主席胡志偉添!

 

志偉同咖哩飯密密斟 究竟係唔係真心?

 

  喺造勢大會未開始嘅時候,Jenny已經見到志偉同咖哩飯密密斟,似乎又冇咩隔閡噃!唔知佢哋係真和,定係面和心不和呢?點都好啦!而家呢個時候對家建制派火力全開,派出雙黨籍嘅鄧家彪,民主派好好醜醜都要做一場團結一心的大戲出嚟㗎喇!如果唔係失咗議席就喊都冇謂!

 

  咖哩飯今日報名嘅時候仲有一段小插曲,就係咁啱原來今日係政府合署嘅火警演習。搞到行家都笑佢「會唔會驚意頭唔好呀?」不過咖哩飯話晒都入過議會、見過吓世面,點會咁易被拋窒呢,佢就話「唔怕」,仲藉機話而家個政治形勢都係咁,會無懼風雨,迎難而上喎!淨講臨場對答應變,咖哩飯暫時比對手阿Bill好少少。

 

「燈神」沈大師撐任亮憲……

 

  睇返港島呢邊,Jenny噚日都講過繼周庭同陳家珮之後,「維園阿哥」任亮憲都話要以獨立候選人身份加入戰團,有股壇「明燈」之稱嘅沈振盈(沈大師)加持,又有財技派嘅周顯等等一眾金融圈人士撐場,仲有一班靚女幫手做PR,睇得出任亮憲呢幾年喺股壇都撈得幾掂。之不過沈大師「燈」力非同小可,「維園阿哥」今轉陪跑似乎已經無懸念……

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新直播節目《hot talk 1點鐘》強勁嘉賓陣容 擴視野 添智慧 玩埋「睇住賞」 贏熱爆獎品 ► 即睇

更多言歸政傳文章
你可能感興趣
#燈 #維園阿哥 #任亮憲 #鄧家彪 #周庭 #陳家珮 #立會補選 #立法會 #選舉 #80後 #本土 #九龍東 #范國威 #港島 #面和心不和
編輯推介
即時報價
全文搜索
Search
最近搜看
中概股回歸
新型肺炎
More
Share