噚日新一批居屋截咗申請喇！今次仲打破咗復售居屋以嚟嘅紀錄，跟據今日最新數宇，去到噚晚7點「截飛」嗰刻，已經收到16.6萬份申請表，都仲未計晒郵寄同埋綠表經屋邨辦事處交嘅申請人添！連房委會資助房屋小組主席黃遠輝果然做得夠耐，個數同佢估計嘅非常接近！之但係呢批居屋只得4431個單位，即係至少37個人爭1個，睇嚟大把無殼蝸牛都係要食白果喇！諗起灰……但新居屋抽得到就代表好？

 

 

唔少人都係趁最後一日嘅Lunch Time過嚟交表，果然香港人都係鍾意做Deadline Fighter！

 

破紀錄有幾奇？

 

　　申請人數破晒紀錄其實又難怪嘅噃，Jenny見今次呢批居屋嗰三座屋苑，有兩座都係喺市區，仲要一個喺長沙灣，一個喺啟德。長沙灣幅地近海，雖然前少少嗰塊地已經有地產商買咗，唔知起私樓定起酒店，但而家暫時未有動作，如果抽中呢度都叫做可以歎返幾年無敵大海景先；啟德就更唔使講，交通方便兼有一流校網，相信唔少啱啱做咗、或者即將做爸爸媽媽嘅朋友都流晒口水！

 

滿城盡是填表人

 

　　Jenny噚日都有趁Lunch Time去房委會視察過吓（唔通順手遞埋表又話你知咩！），見到唔少人都係趁最後一日嘅Lunch Time過嚟交表，果然香港人都係鍾意做Deadline Fighter！成個房委會多人到搵唔到位攝入去咁滯，有人即場係中心出面條樓梯填表已經見怪不怪，小妹直頭見到有人喺地鐵站出面攤開文件填表，認真不得了！

 

　　去到傍晚接近截止嘅時間，Jenny仲見到唔少申請人作最後衝刺，有位先生仲跑到入門口就跌親，堅係「仆」入嚟申請！仲有人「只差一點點」即可以交到表格，「可惜偏偏剛剛擦過」道門就閂鬼咗！相信大家都喺電視到見到佢有幾「嬲」同有幾「震」，Jenny就費事喺到Post多次張相，對嗰兩位先生做二次傷害了，未睇過條片嘅朋友都係自行睇返電視同Facebook喇！

 

下次再抽會更平？可能啦！

 

　　話說回來，香港人都真係好悲哀，營營役役搞到一仆一碌，都只係為頭上片瓦，以為政府會幫吓你咩？真係少年你太年輕了！而家居屋因應市價定價，自然愈賣愈貴，個家庭入息上限焗住去到5.7萬，老實講其實都偏離咗資助房屋幫中下階層置業嘅原意……所以各大黨派都大叫增加折扣率，近日Jenny都聽聞房委會有意第時將居屋會六折出售，所以今次交唔切表嗰位先生，可能下次入表有得「遲買平幾舊」嘅……點解得幾舊咁少？皆因樓價日日升，到時即使有六折都好，又可以有幾平吖？想上車？套一句Jenny同事的說話：買六合彩可能仲實際啲！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇