過往專欄

2018-04-20

喬老爺訪港傳「聖旨」林鄭都要坐定定聽!

#基本法 #立法會 #選舉 #張建宗 #fake #喬曉陽 #23條立法 #23條 #港獨 #林鄭月娥

　　稱「喬老爺」嘅前全國人大法律委員會主任委員喬曉陽嚟咗香港，聽講話會逗留一個星期㗎！今日就同啲政府高官、高級公務員「講書」，都有成200人出席，特首林鄭都有份坐定定嚟聽！

好彩新聞處有影到相啫!

喬老爺到港唔講港獨有乜講？

　　而家23條立法嘅新聞日日都聽到，Jenny亦都知喬老爺講嘢好Juicy，唔知今次又會唔會有啲「金句」爆出，例如催吓政府立法咁呢？身為行會成員嘅湯家驊就同Jenny講，其實今日個座談會都係講憲法，冇講到23條噃！不過喬老爺都有鬧兩句港獨，話對於港獨覺得好心痛、絕不容許分裂國家云云。

　　下晝就去埋睇新嘅立法會大樓，小妹即刻問下「特約導遊」立法會主席梁君彥同喬老爺傾咗啲咩先!主席話同喬老爺都算相識咗一段時間，佢今次嚟都只係禮節性會面，Update吓立法會嘅近況，就冇講咩「港獨」嘅話題嘅。今朝就講少少，晏晝就直情唔講，等Jenny仲以為喬老爺會有咩「金句」畀大家嗒吓添！話晒呢期「港獨」、《基本法》23條最紅呀嘛！

張宗神出鬼沒行家被fake 「兇手」是誰?

　　話時話，講起宣傳《基本法》，Jenny就激氣！事關今日政務司司長張建宗(張宗)出席一個關於推廣《基本法》嘅活動啟動禮，《基本法》喎!Jenny梗係要去睇睇！新聞處同Jenny講活動時間係下午3點9，小妹早咗半個鐘頭到，已見有行家收拾緊行裝，仲話張宗已經走咗！咩話?

　　原來係張宗早咗成個鐘到，致辭完扑咗兩分零鐘咪就閃咗水！唔少行家同Jenny一樣中咗伏，連三色大台都不能倖免，一到場就見到張宗扑緊咪，Set好攝影機嗰吓，張宗就轉身離開......冇片交差，超慘豬!

　　事件引起一眾行家公憤，齊齊鬧爆新聞處，新聞處都要申冤：「我乜都唔知㗎」！Jenny不是省油的燈，當然要打電話去主辦單位「就是敢言」詐型，原來係主辦單位改咗好多次流程，又冇及時通知新聞處，結果就令一眾行家（包括小妹）齊齊中伏！仲話冇估到會有咁多行家到場。What?Are you kidding?推廣《基本法》再加政務司司長，點會少人呢?Jenny奉勸主辦機構好好搞搞個公關佢啦!