自從2016年立法會選舉時梁天琦、陳浩天等人被DQ參選資格後，就好似開啟咗個「潘朵拉的盒子」咁，DQ事件接踵而來，先有DQ埋當選嘅青年新政梁頌恆游蕙禎，再有4個做緊嘢嘅非建制「中招」，仲有上次311補選，自決派嘅香港眾志周庭連解釋嘅機會都冇，一樣被人DQ咗。自從人大常委針對宣誓案釋法，立法會參選資格即時受影響，今次仲可能蔓延去到區議會添！

當初周庭同姚松炎一齊搞反DQ集會，結果一個被DQ一個敗選。（周庭Facebook）

　　是咁的，今日有間好接近權力核心嘅報章話，主張港獨同埋自決都「極可能」要喺區議會選舉中止步，因為《區議會條例》同《立法會條例》一樣，要求候選人要擁護《基本法》及效忠香港特別行政區。篇報道引述埋政府嘅法律意見亦都話，區議會同立法會參選資格應該要一樣，所以有可能講港獨或者自決，唔只選唔到立法會，連區議會都冇你份！

　　其實而家區議會入面，的確有區議員係主張「香港獨立」，最明顯莫過於沙田區議員陳國強，Jenny都記得佢都有報名參加上次311補選，就係因為主張港獨而被DQ，不過佢呢個主張就未燒到去佢嘅區議員身份；小妹亦都收到風，香港眾志雖然因為主張自決被拒入立法會，但佢哋嘅秘書長黃之鋒都想參加下年嘅區議會選舉。但係如果今次區議會同立法會同樣做法，呢兩位嘅選舉夢都可以拜拜了！

　　不過Jenny仲記得，由當初政府第一次用DQ寶劍時，當時嘅選舉主任都有多次向梁天琦查問佢嘅港獨立場，但係去到上次香港眾志嘅周庭，佢主張嘅係比港獨更溫和嘅「民主自決」，但係嗰次選舉主任就只係問過佢國籍問題，轉個頭就順手DQ埋。而噚日周庭先向高等法院提選舉呈請，不過審得嚟，相信都選下次立會了！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情