收藏文章 

2018-05-10

建制又投錯票 廖班長仲要唔係第一次

  立法會今個星期繼續審《財政預算案》,大主席梁君彥一早就講明今日會表決到修正案同埋全部修正案,噚日仲預告今朝11點幾就可以開始表決修正案。不過有成67項修正案,當係每項都用1分鐘表決,都要用成個幾鐘,所以當表決修正案嘅時候,民建聯「大家姐」李慧琼(琼子)就要求將點名鐘聲由5分鐘變成1分鐘,將成個表決時間縮短咗好多!

 

 

  不過Jenny成日都懷疑,得1分鐘時間,大家係咪真係夠時間睇清楚自己係投緊邊一個修正案呢?小妹再望望修正案份流程,發現政府個修正案同議員嘅修正案係撈埋一齊,突然心感不妙,成日都會投錯票嘅建制派今次會唔會又「甩轆」呢?

 

  果不其然,經過一輪表決之後,終於去到第62同第63項由財爺提出嘅修正案,雖然兩個表決都係通過,不過第62項就有4票反對,第63項就只有2票反對,點解嘅?點解嘅?睇返份座位表,發現兩項修正案都投反對票嘅係田北辰(二少)同埋鄭松泰(泰博),而第62項另外兩票,原來係來自建制派「班長」廖長江同埋馬逢國!

 

都是貪快惹的禍

 

  田北辰一早講明唔支持派錢,都可以理解佢點解投反對,不過廖長江同埋馬逢國又何解會反對嘅?事後佢哋就講返,原來真係因為「投.錯.票」!廖班長話嗰陣佢處理緊其他事務,冇為意個投票係投政府個修正案;而馬逢國就話,因為之前一直都係投緊民主派嘅修正案,梗係要全部反對喇!點知去到政府嗰個就唔小心㩒錯掣,其實佢係贊成政府個修正案嘅!好彩唔係全部建制派都同兩位一樣,如果唔係又「甩轆」嘅話就唔好喇!話晒今次係《財政預算案》呀嘛!

 

  不過,其實廖班長都唔係第一次投錯票㗎啦!例如財委會審沙中線追加撥款、修改議事規則,一係就投錯反對,一係就冇投到。但係次次都「甩」喺啲咁重要嘅位,作為「班長」會唔會唔係幾稱職呢?

 

譴唔譴責泰博,結果或者都一樣......

 

  話說唔知係唔係為咗配合特首個四川團,大主席喺表決完《預算案》之後,就即刻叫大家休會,而本身排咗喺後面嘅譴責鄭松泰倒插國旗嘅議程就未有得傾住。Jenny記得調查委員會主席梁美芬本身仲諗住今日可以傾埋,睇嚟都係要等多一個禮拜喇!非建制嗰邊就話過會撐泰博,斷估到時唔會似得建制咁投錯票掛!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多言歸政傳文章
你可能感興趣
#財政預算案 #財爺 #立法會 #投錯票 #甩轆 #修正案 #廖長江 #馬逢國 #田北辰 #鄭松泰
編輯推介
即時報價
全文搜索
Search
最近搜看
雙幣交易
聚焦兩會2024
More
Share