收藏文章 

2018-05-17

鄭松泰甩難保議席 民主派「枉作好人」?

   建制派恨咗好耐嘅譴責鄭松泰動議終於有得辯論喇!雖然大家一早都知數人頭之下,係一定會被否決。不過平時好少㩒掣發言嘅建制派都忍唔住要出聲,好似肥老闆張華鋒、馬逢國,仲有唔聲唔聲,一出聲就派Bite嘅蔣麗芸(Ann姐),一於大大力鬧咗先!

 
竟由AY提琼子要「一國」行先!

 

  一開場AY就一馬當先,講明公民黨唔同意鄭松泰(泰博)嘅行為,但亦都唔同意要嚴重到褫奪佢嘅議席;而民建聯「大家姐」李慧琼(琼子)都唔執輸,亦都發言反擊話支持動議,仲拉到去話鄭松泰宣誓唔啱,以政府當初DQ周庭參選資格嘅準則嚟睇,直情一開頭就唔應該畀佢參選添!之但係可能琼子唔係法律系人士,所以唔記得咗香港嘅法律係無追溯期?

 

 

  琼子桌面上仲好識做咁又插咗國旗區旗喺杯座,不過格式就唔係好啱啦!連民主派都忍唔住要提吓佢。事關國旗區旗擺埋一齊嗰時,國旗都要高過同埋大過區旗,話晒「一國兩制」都係「一國」行先呀嘛!

 
民主派「救」完人 仲要被串?

 

  作為民建聯「大家姐」,琼子就梗係被民主派追住喇,議會陣線嘅毛孟靜(Miss Mo)就不滿明明個動議係講緊倒插國旗,琼子就拉到去泰博嘅宣誓、投票意向云云,質疑建制派咁講明顯係針對個人,而唔係針對個行為喎!最後結果因為民主派齊人,建制派差兩個(民建聯陳恒鑌、經民聯石禮謙)之下,以39票對25票,唔夠在席議員三分之二贊成而否決咗嚕!

 

 

  不過民主派同泰博一向都好少偈傾,今次為保泰博個位,都要係咁「利申」返唔認同泰博嘅行為。而泰博都話,唔覺得今次要特登多謝佢民主派,一嚟就好似暗串佢哋平時唔投票,二嚟就係個重點係用議事規則DQ議員係唔係啱,所以唔涉及「幫唔幫」喎!民主派今次會唔會覺得自己「枉作好人」呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#鄭松泰 #譴責 #一國兩制 #國旗 #區旗 #DQ #立法會 #選舉 #本土 #中國
編輯推介
即時報價
全文搜索
Search
最近搜看
More
Share