今日下午梁國雄（長毛）同劉小麗齊齊開記招，原來係宣布又多一個人要放棄DQ案嘅上訴，今次就係劉小麗喇！

 

　　小麗話，因為法庭嗰邊同佢講，長毛同佢單案有可能要分開審，甚至乎要重新排期。佢見個審訊期似乎仲有好大變數，經過自己衡量，再同民主派傾過之後，決定撤回上訴。

 

 

長毛話小麗放棄都係一個好正常嘅決定喎......點都好客觀上而家九龍西同新界東個兩席係分開咗選。

 

放棄上訴為阻兩議席齊補選

 

　　之前就一直有消息話，其實小麗放棄上訴，係因為民主派已經達到阻止政府將兩個同區議席一齊補選嘅目的。不過小麗就係咁否認，話係因為單案拖得太長時間喇，虛耗咗太多精神同金錢，決定撤回都係好無奈咁話。

 

　　打埋算盤都算「隊友」嘅長毛亦都幫口話：「單案拖咗成年幾，真係得我先會等！」，又指自己就話有法援啫，但係小麗冇，所以佢放棄都係一個好正常嘅決定。不過無論佢哋認又好，唔認都好啦，客觀上的確而家九龍西同新界東個兩席係分開咗選，目的可謂達到咗，又好難人哋唔咁樣諗噃！

 

「政壇老鬼」李卓人又出山？選民Buy至得……

 

　　小麗今次放棄上訴，即係九西好快就會補選，Jenny收到風應該係下年年初攪，即係選舉工程都差不多時候開波。小麗都有意再戰，但係自從連講自決嘅香港眾志周庭都要被DQ，小麗似乎都危危地喇！所以佢呢排都搵咗「政壇老鬼」李卓人做後備，之但係早前九西補選嗰時，自決派先啱啱「焗」走咗另一個「政壇老鬼」馮檢基（基哥），轉個頭又玩返老人政治，加埋上次姚松炎九西爆冷墮馬，選民仲肯唔肯聽你枝笛，都真係好難講咯……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇