收藏文章 

2018-06-15

想化解關公災難?問吓EQ同舜仔啦!

  今個星期日就係爸爸節,喺民建聯(民記)入面一講起「爸爸」二字,相信一眾網民最記得嘅就係鄭泳舜(舜仔)參選嗰陣,被蔣麗芸(Ann姐)教授「攬攬爸爸」呢一個經典場面喇!而今日同舜仔同場嘅葛珮帆(EQ),就親身示範如何完美化解關公災難! 

 

 

民記婦女事務委員搞茶聚講爸爸?

 

舜仔爸爸節唔再「攬攬爸爸」?

 

  是咁的,民記嘅婦女事務委員會今日搞咗個茶聚,搵咗幾個做咗爸爸嘅議員同區議員,同大家講吓喺爸爸節有乜Do!EQ作為呢個委員會嘅主席,梗係要喺到主持大台喇!佢仲做埋記者嗰份,問舜仔做咗立法會議員之後,有冇少咗機會見屋企人。

 

  舜仔就即係「感性Mode On」,大呻自己成日掛住如何招呼人哋嘅爸爸,做埋立法會議員之後更加少咗返屋企,好掛住3個囝囝咁話喎!佢仲話,囝囝都好有興趣了解爸爸嘅工作同壓力,不過佢哋都係好含蓄,唔會直接講「辛苦啦」,但呢啲嘢在心中,「大家都明㗎啦!」

 

  EQ就問舜仔,今個星期就係父親節,有咩說話想同囝囝講呢?舜仔就話好多謝囝囝體諒自己。跟住EQ話題一轉,問舜仔「咁爸爸呢?會唔會『攬攬爸爸』?」舜仔就好從容咁答話:「得得得,大家都已經好親密!」睇嚟舜仔已經「訓練有素」,就算講返呢啲瘀事都可以面不改容喇! 

 

攬媽唔攬爸咁係唔得o架

 

  問完舜仔,EQ都問吓身邊嘅東區區議員林心廉(Sam)有冇都攬攬爸爸先?Sam就話自己好少攬爸爸,攬媽媽多啲。EQ就食住個勢話:「所以真係要提,唔提真係唔識攬攬爸爸!」嘩!呢個Moment,又真係不得不讚下EQ嘅急才!

 

  Jenny都覺得,好多時臭屎唔係靠密冚就得㗎,正視佢、清理佢先可以治本㗎嘛!關公災難都係一樣道理。今次舜仔同EQ就識玩喇!其他議員真係要學吓嘢!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#攬攬爸爸 #80後 #立法會 #父親節 #葛珮帆 #鄭泳舜 #民建聯 #關公災難
編輯推介
即時報價
全文搜索
Search
最近搜看
25周年慶
脫歐鬧劇
More
Share