近排「空置稅」嘅風吹到行一行，行會今日就召開特別會議，唔少行家都引述消息話，今次會議主要係拍板將部分已規劃為私人樓宇的土地改為起資助房屋、將居屋與市價脫勾，同埋推空．置．稅！一向傳媒收風，就多數係消息人士口頭上「放風」，但今次竟然畀Jenny發現有一幅有關「娥3招」嘅四格卡通懶人包喺網上流傳，內容仲幾詳細吓……唔通係政府「放風」新玩法？定有人偷步Send咗政府嘅宣傳品出嚟？其實......大家都誤會晒喇！

 

呢張懶人包漫畫究竟邊度嚟？睇埋落去就知喇！

 

Deadline Fighter 再現 料聽日正式向外公布 

 

　　其實當初月中嗰時，林鄭已經大大聲話今個月內會交代空置稅，結果Jenny同一眾行家等到禮拜頭，只見林鄭去完歐遊再上京，都驚佢係唔係真係趕得切喺今個月內公布，不過署理特首張建宗就好淡定，仲話離30號都仲有3、4日時間，叫大家「耐心啲」喎！林鄭返港後亦叫大家等多陣。今日板就拍咗喇，消息就話聽日就會正式向外公布三大房屋措施。果真係實踐承諾喇！

 

網傳懶人包漫畫 原來係地產公司出品

 

　　不過大家都知喇！政府講嘢不嬲都長夾譖，所以近年都順應潮流，當有新政策推出時，都會整吓卡通漫畫去作簡單解說。話說，當一眾行會成員仲開緊會嗰陣，Jenny就已經見到網上流傳咗一張「娥3招」懶人包漫畫，心諗邊個咁大膽竟敢偷步公開政府宣傳品？

 

　　原來張圖係一間地產公司整出來㗎！並唔係政府官方宣傳品。老實講Jenny覺得製作幾精美，只係略嫌畫得林鄭面長長，望上去真係好似唐英年，點睇都怪怪地咁，十足唐英年戴住假髮……同事仲同Jenny講笑話，政府畫開嗰個林鄭係Cute版，邊會畫成咁呀……

　　至於政府Style嗰個懶人包係點？大家過兩日咪知囉！

 

 

呢個係政府畫師眼中嘅林鄭，Cute好多!

　　

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇