馮檢基（基哥）噚日廣傳採通，大大隻字咁寫明係講｢民協與馮檢基就其去向」，明眼人一睇就知基哥要宣布同民協分手喇！睇嚟基哥都知佢嘅退意已經去不言而喻嘅境界，今日個記者會佢一嚟就掛住講準備喺書展出嘅新書，「一路寫書一路就覺得……」、「成日寫到凌晨4、5點」云云，Jenny同行家們都覺得自己似去咗基哥個新書發布會多啲囉！

 

 基哥完美演繹：若注定有一點苦楚，不如自己親手割破～～～（《好心分手》－盧巧音）

 

退黨記者會唔好講政治？

 

　　基哥一路講一路講……掛住講寫書嘅心路歷程，連正式一句「我退出民協」都唔記得咗講，要去到Q&A環節，有行家提及先補充返！不過佢Sell書還Sell書，作為「屈基事件」嘅主角，加上喺上次初選講完「呢次係我最後一次參選」但又蠢蠢欲動，大家最關心嘅梗係都係佢退黨之後嘅政治動向啦！

 

　　基哥聞言就三緘其口，淨係話現時冇諗過選舉嘅事，仲話「今日唔講政治問題」！但係基哥，你退出民協，呢件事本身就已經係政治事件喇！呢句「今日唔講政治問題」，簡直可媲美容海恩嗰句「我覺得議會內外都不應該牽涉太多政治」！

 

初選？唔初選？邊個說了算？

 

　　基哥唔答政治，大家咪轉問民協主席施德來（阿來）囉！基哥仲喺民協嘅時候，民協一直企硬話民主派補選Plan B人選應該由初選選出，而唔係由劉小麗決定。噚日就有報道話，基哥講到明退黨後唔會參選今次補選，而民協都會接受劉小麗屬意嘅李卓人做Plan B。不過阿來就澄清，民協仍然堅持應該由初選選出Plan B。

 

　　不過Jenny只係覺得，由頭到尾想靠初選翻身就得基哥，所以民協先會支持初選，有可能其他人都認為以劉小麗決定人選都無傷大雅，始終今次選嘅係劉小麗嘅議席嘛！但係基哥一退，民協就「轉身射個三分波」，話贊成唔駛初選，咁咪擺明係落基哥面，所以先口頭上堅持返都係要初選先得嘅！

 

　　話時話，Jenny就估，如果今日記者個牌頭真係「新書發布會」，可能會嚟嘅記者都只係小貓三兩隻，但拎出「退黨」呢兩隻咁搶眼嘅大字，就梗係吸引到更多嘅傳媒喇！不過基哥就極力否認，話咁做太羞恥啦！至於信不信？反正Jenny就信了……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情