上星期講到一直被建制派說緊出選嘅前食物及衛生局局長高永文（高醫生，又稱「民望高」），卒之話「唔GO」，唔會參加今年11月嘅九龍西補選，建制都隨即有新嘅人選出現，就係高醫生之前做局長嗰時嘅得力助手、前食衛局政治助理陳凱欣喇！但係阿欣直到而家都係話自己仲「考慮中」，可憐一直「很想要」九龍西議席嘅經民聯梁文廣，同埋自由黨嘅李梓敬，要坐冷板凳，冇人理！

 

 

李梓敬(左一)同阿欣(右一1)係喺今年3月補選時，因為幫鄭泳舜拍片而認識嘅。(李梓敬facebook圖片)

 

「三人行」要嚟個了斷

 

　　不過，出晒名協調度高嘅建制派，又點會畀咁多人出選去分薄票源呢？所以呢個「三人行」點都要嚟個了斷！結果今日Jenny就喺Facebook發現，李梓敬首先出嚟宣布，佢決定唔參加補選啦！

 

　　李梓敬話，自己同阿欣係喺今年3月補選時，因為幫鄭泳舜拍片而認識嘅，大讚阿欣「除咗有豐富嘅政治人脈，對政策同政治嘅深入認識，亦都有一顆關心別人嘅心」，亦都不時會就住佢嘅工作交流同俾意見，仲賣晒口乖話阿欣「確實是值得支持的人選」添！

 

李梓敬：有啲遺憾

 

　　之但係恨咗咁耐去選，你話完全唔介意就假嘅！李生意有所指咁話：「雖然我都希望可以代表建制派出選，喺大局面前，個人得失其實一啲都唔重要」；又直認冇得選係「有啲遺憾」。不過從來「to 選or not to選」，都唔係佢一個人話到事嘅……

 

　　雖然少咗一個李梓敬，九西都仲有一個梁文廣躍躍欲試。呢幾日都有消息話建制派已經完成協調，選定阿欣做「真命天女」，但係梁文廣就話未收到協調結果噃！就Jenny見咁多位政壇元老，好似葉劉、全國政協委員張志剛、前財庫局局長陳家強，連同高醫生都話全力支持阿欣，似乎個結果都呼之欲出喇！

 

　　話時話，Jenny記得2016年嗰時，九龍西嘅6名當選人清一色都係女性，唔知建制係唔係都考慮過呢一點，所以唔敢畀身為男性嘅李梓敬同埋梁文廣去馬呢？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

WoW WoW星期三：健康網購產品低至$99 (只限今天)► 立即行動