高鐵會喺今個月23日通車就係人都知，不過大家又記唔記得「一地兩檢」條例草案其實喺今日就會開始實施呢？換言之，西九龍站入面嘅內地口岸區由今日已經交咗畀內地管㗎啦！

 

 

(政府新聞處圖片)

傳媒冇得見證歷史一刻

 

　　喺香港管轄區入面劃一個內地管轄區，話晒都係一件大事，點都會有個交接儀式啩？按照慣例，呢啲歷史性時刻，都會有採訪安排，之不過Jenny噚日等到變長頸鹿，都唔見新聞處有通告出……

 

　　點知Jenny以為可能另有安排之時，無啦啦喺凌晨12點突然出稿，話「《廣深港高鐵（一地兩檢）條例》開始實施」，仲話「為誌其事，運輸及房屋局局長陳帆和廣東省人民政府副秘書長林積於西九龍站主持內地口岸區啟用儀式」仲已經相都影埋，散咗Band咁款……小妹當堂Ｏ晒咀！明明話「為誌其事」㗎嘛！點解唔叫傳媒入到去探訪噃！嗚嗚！

 

不是儀式的儀式 不是過夜的過夜

 

　　適逢今日特首林鄭有行政會議要開，Jenny同一眾行家梗係要了解下點解「落閘」啦！不過未待記者發問，林鄭睇嚟Feel到行家們怨懟眼神中嘅疑問，所以喺開場白主動提及呢件事，仲強調「今早凌晨喺西九龍總站嘅內地口岸區並無進行過啲咩儀式，純粹係一個工作層面嘅交接」。之但係林太，凌晨嗰份新聞稿又真係大大隻字寫明係「啟用儀式」，咁個講法有未「夾好口供」之感噃……

 

 

明明大大隻字寫住係「啟用儀式」。

 

　　除咗呢個「不是儀式的儀式」之外，仲有個「不是過夜的過夜」。是咁的，有記性嘅朋友仔可能都會記得，政府之前就成日話內地人員唔會喺西九龍站過夜。但係今日林鄭就話，內地人員都有「通宵更」要返，不過佢哋係唔會離開內地口岸區！Jenny就覺得，咁其實咪即係「過夜」？……睇嚟喺呢個內地口岸區發生嘅事真係「難分真與假」，定中港有文化差異？嗱！學馬主席講返句：「我話OK就OK」，咁咪得囉！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇