收藏文章 

2018-09-05

小麗重奪九西有暗湧?民主派又嚟內訌?

  九龍西補選仲有唔夠3個月就到,建制泛民都好罕有地未有公布參選名單!不過相信明眼人一望就知,兩邊各派邊個出嚟應戰喇!

 

 

基哥家下嬲嬲豬呀!(設計圖片)

 

「健康大使」阿欣人氣急升 

 

  上次Jenny就講到,前食物及衛生局政治助理陳凱欣呢排揹住「健康大使」呢個名,喺九西周圍插旗,甚至乎喺紅磡「大酒店」後面一座好高嘅大廈外牆到,掛咗幅巨型大頭Banner,聽講價值六位數字!雖然選址上係有少少怪怪的感覺,不過阿欣嘅人氣度同曝光率毫無疑問係一路急升呀!

 

  阿欣今次雖然叫做幫一個建制團體九龍社團聯會做「健康大使」,但係佢哋肯使咁多錢去幫阿欣插旗,又真係好難唔畀人「估到」建制嘅真命天女就係佢噃!不過,唔知係唔係個巨型Banner太大使費,Jenny上星期路過九西,見到九龍社團聯會賣旗籌款,仲聽到阿欣把聲喺到呼籲添!不過可惜就只聞其聲,不見其人喇!

 

民主派敲定小麗 基哥嬲嬲豬

 

  至於民主派呢邊,基本上都敲定咗搵劉小麗「重賽」㗎啦!不過今日就有啲不利消息傳出噃!就係退咗民協冇耐嘅馮檢基(基哥)有話兒喇!

 

  是咁的,基哥今日搞咗個傳媒茶聚,大家最關心嘅就梗係佢上次講嗰句「最後一次參選」仲算唔算數喇!基哥雖然繼續話「而家唔考慮」,但又意有所指咁話如果冇初選,佢會「再三積極考慮自己嘅角色」噃!佢仲鬧小麗未有初選就自己揀定Plan B,係「特權主義、威權主義復辟」,仲燥燥地咁話如果唔肯搞初選,自己更加唔會為小麗助選添!嘩!講到咁白,小麗睇嚟都危危乎,民主派似乎要做定心理準備面對外憂同內患喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#民主派 #陳凱欣 #九西 #九龍西補選 #馮檢基 #劉小麗 #李卓仁 #健康大使 #選舉 #本土
編輯推介
即時報價
全文搜索
Search
最近搜看
More
Share