收藏文章 

2018-09-07

高鐵:我話「首發」就係「首發」!

  高鐵就嚟啦!所以港鐵呢排要密密開PC,力Sell高鐵有咩正嘢!今日Jenny就見到佢哋公布預售車票嘅詳情,仲話幫鍾意搶「頭啖湯」坐頭班車嘅市民諗好攻略喇!可謂非常有「創意」……

 

 

9月10日起開始預售喇!

劉天成:「全日都係首發車!」

 

  不過有人就會覺得用新嘢係「行先死先」,亦都有人覺得「執輸行頭慘過敗家」,無論你信邊樣,港鐵早已為你準備!港鐵車務總監劉天成話,喺通車首日「全日都係首發車」!此言一出,Jenny同一眾行家都「黑人問號」,原來佢嘅意思係指高鐵全日有唔同車去唔同地方,所以每個地方都有佢自己嘅「頭班車」!劉生,你呢個笑話又真係幾好笑喎……

 

實名制幫唔到杜絕黃牛

 

  無論係唔係全日都有頭班車都好,Jenny相信以香港人「乜都炒」嘅習性,高鐵飛可能都不能倖免,話唔定遲下仲有黃牛添!港鐵就預視到呢個情況,限制每人只可以買8張飛,仲整返個實名制嚟買……8張入面其中1張咁大把囉!港鐵以為咁樣就可以杜絕黃牛?Jenny只能講一句「少年,你太年輕了」!大家都係擔定櫈仔,喺柯士甸站瞓返幾晚先啦!Jenny嘅行家仲會影低你嘅倩影,從此名留鐵路史。

 

  咪話Jenny唔益大家喇!下圖就幫大家列晒所有「首發車」時間,自己睇啱地點就好去撲飛喇!

 

 

etnet財經 ‧ 生活App獨家「銀行匯率比較」功能 立即下載 iOS/Android

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多言歸政傳文章
你可能感興趣
#高鐵 #頭啖湯 #頭班車 #一地兩檢 #廣州 #預售 #車票 #實名制 #黃牛 #撲飛
編輯推介
即時報價
全文搜索
Search
最近搜看
新型肺炎
全球放水
More
Share