喺八、九十年代嗰時，可以話係港產片最輝煌嘅時代，Jenny求其數都可以數到幾十套經典電影同人物；不過去到而家，大家對一上次睇嘅電影係港產片定係外語片呢？唔使話畀Jenny知喇！大家心照！

香港電影業還有多少「香港」？

　　到底點樣先可以令香港電影業重拾舊時嘅光輝呢？團結香港基金高級研究員水志偉（Kenny）就同Jenny講，話要透過政策倡議，令香港電影業再創高峰喎！

　　嗱！Kenny就話，其實香港電影嘅全球市場票房分布中，內地就佔咗其中嘅96%；而合拍片佔內地票房有成十幾至廿幾%，而港產片得零點幾%，所以拍中港合拍片比起純港產片更收得、為香港電影業帶嚟更多機遇，仲提議而家大灣區咁Hit，一於就同大陸聯手搞返個「華南電影製作中心」添！

「大灣區人」？「大灣區片」？

　　之但係，中港合拍片一直都有要求，就係要套戲入面要有三分之一以上嘅內地演員，同埋要包含內地元素等等。如果真係好似團結香港基金咁「面向大陸」，Jenny就覺得同純港產片都係有一段距離……到時唔通又係「我們都是大灣區人，港產片都是『大灣區片』」？

　　Kenny就話，佢哋都有喺建議度提到，希望政府幫拖向內地爭取放寬合拍片要求，而且合拍片先至可以有更多空間，向大陸輸入更多香港元素喎！不過，面對住內地咁大個市場，到底係我哋輸出到幾多香港元素出去呢？Jenny其實覺得有時好睇嘅電影唔需要大場面、大卡士、大製作，有心最重要！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情