收藏文章 

2018-10-15

鄧忍光被爆「特事特辦」過關?真係唔荒唔「論盡」喇!

  特權事件又出現?政圈今日熱話就係政制及內地事務局常任秘書長鄧忍光喇!話說佢喺上個月高鐵開通儀式嗰日,跟大隊齊齊上廣州,點知唔見咗身份證同回鄉證,返到西九龍站就用嘉賓證同實名車票「證明」自己身份出入境,點知又真係得咗噃!唔通鄧常秘咁好人幫記者們實測高鐵保安?

 

 

 

鄧常秘可即日來回 記者就要再坐一會

 

  話說回來,如果鄧忍光唔係鄧忍光,又有冇咁易一日之內返到香港呢?有啲嘢都係記者自己落手落腳做返好!有行家就即時照辦煮碗實測咗一次,但係就畀西九站入面嘅內地人員告知,要返去內地搞返個「臨時通行證」先可以過關,最快都要第二日先可以拎到㗎!再加上有份去開通儀式嘅葉劉都話,其實個嘉賓證上面只係寫咗活動流程,冇紀錄個人資料,所以鄧常秘今次就惹嚟新一輪「特事特辦」嘅質疑!

 

內地關員說了算?

 

  而政制及內地事務局都證實咗係有呢件事,不過就強調鄧生喺過程中冇要求過任何嘅特別處理。咁啱今日鄧生要去立法會開會,大家梗係要捕到實啦!所以主角一出嚟就被行家們團團圍住,雖然鄧常秘就話自己今次係「論盡」,亦都強調返,做乘客要聽從內地口岸人員嘅指示,做足要應該做嘅嘢。

 

  鄧生講得一句就急急腳咁走咗,不過Jenny聽落就覺得,鄧常秘言下之意,係咪想話「我唔知呀!我都係照做㗎咋!」呢?之但係,鄧常秘話晒做過海關關長,又為官多年,爬到去咁高位,如果內地人員話乜就乜,一切照做,好似政治敏感度唔多夠噃!就好似今次咁,又引發一場「關公災難」,真係唔荒唔「論盡」喇!Jenny都奉勸大家,無論你係唔係鄧常秘呢個Level,出門在外要記得Keep好自己嘅證件呀!

 

etnet財經 ‧ 生活App獨家「銀行匯率比較」功能 立即下載 iOS/Android

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多言歸政傳文章
你可能感興趣
#高鐵 #政制及內地事務局 #關公災難 #特事特辦
編輯推介
即時報價
全文搜索
Search
最近搜看
新型肺炎
全球放水
More
Share