聽日開始，大型音樂節Clockenflap 2018就會一連三日喺中環海濱舉行，又有歌聽又有美食，Jenny同一班好姐妹一早就撲定飛，坐等Happy Friday喇！

阿德到時究竟會用咩形象現身呢?

政府吉祥物都識Rap？

　　Clockenflap會有唔少國際頂級歌手同樂隊出場，之但係Jenny噚晚喺Facebook就見到另一政府吉祥物－－清潔龍阿德話，佢都「夢想成真」，有得喺Clockenflap度獻唱噃，仲起埋藝名叫「Lil Tak」！吉祥物都Rap？仲要係喺Clockenflap？Jenny同一班姐妹表示O晒嘴！

MV夠迷幻獲網民激讚

　　咁阿德會唱咩歌呢？原來上兩個禮拜，清潔龍阿德喺Facebook就Up咗首新歌，叫做《我今天出了一首TRAP MUSIC 叫做我叫做KEEP CLEAN AMBASSADOR》，齋聽個名都已經夠Rock！成首歌同MV仲好鬼迷幻，唔聽歌詞真係好似Hip Pop咁，一啲都唔似平時政府啲宣傳曲咁老套！之後網絡就出現咗個Tag: #推到阿德上Clockenflap喇！

　　唔好睇少阿德首歌，原來都有成千幾個Share！嗱！阿德就話，今個星期五晚九點半，佢就會喺Clockenflap嘅YourMum Stage現場獻唱，究竟佢係咪會著住公仔衫上台呢？嗱！大家記得洗乾淨對耳仔去聽之餘，都要好似首歌咁講：「保持衞生，身體力行，加勤清塵，人人做個好市民」喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情