收藏文章 

2018-11-09

港珠澳大橋逼爆!帆哥教大家唔使5蚊出「市區」?

  港珠澳大橋連續兩個星期逼爆!連帶東涌居民嘅生活都受到影響,大批旅客「血拼」之下,「喼」來「喼」往,唔少居民都感嘆連遠離市區嘅東涌都「淪陷」了!嗱!聽日又到周末喇,為防連續三個禮拜都出現咁嘅情況,今日政府就一於派出三個局長出嚟,齊齊拆掂佢喇!

 

 

帆哥「貼士」伏唔伏?

 

  講起運輸呢家嘢,又點少得我哋嘅陳帆局長(帆哥)呢?佢今日除咗公布傳聞中嘅開通內地旅行團預約服務、放寬旅行社申請泊車位預訂時間等等嘅措施之外,帆哥仲醒咗條「貼士」畀各位內地客吖!

 

  帆哥話,希望大家多啲選擇用B5巴士,由欣澳轉乘去市區喎。佢仲話值得選擇嘅原因係「因為佢收費大概5元8毫㗎啫,而且轉乘港鐵係有(平)1蚊優惠,所以4個8銀錢就已經可以去到市區喇!」

 

講吓講吓亂晒籠!

 

  聽落好似好著數咁噃!咪住先,Jenny好似從來都冇聽過喺欣澳搭港鐵去市區係免費……究竟係帆哥「成功爭取」港鐵「大減價益大家」,定係小妹太大鄉里,唔知而家欣澳已經變咗「市區」喇?咁如果欣澳係「市區」,即係話唔使轉乘港鐵喇!咁車費到底係$4.8定$5.8吖?媽,好亂呀!帆哥你搞清楚未㗎?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#港珠澳大橋 #大橋通車 #血拼 #東涌 #陳帆 #港鐵 #欣澳
編輯推介
即時報價
全文搜索
Search
最近搜看
More
Share