收藏文章 

2018-11-12

致謝但不支持?曾前主席又發「地圖炮」!

  一連三日嘅《施政報告》致謝議案上個禮拜五就辯論完喇。今年同上年一樣,建制派喺DQ之後擁有人數上嘅優勢,所以致謝議案都係無意外地通過咗。特首林鄭今日都話議案得以通過,政府上下都要努力落實措施喎!

 

動議通過就代表好?

 

  雖然致謝動議通過咗,但都唔代表林鄭所希望嘅行政立法關係真係有改善,事關上年有3名民主派投咗贊成票,但今年就得返衛生服務界李國麟1個,計返條數,好似仲……不過Jenny最留意嘅都唔係呢樣,而係民建聯嘅漁農界議員何俊賢投票前,雖然就大批今年份《施政報告》對漁農界嘅措施少到「大家數得到」,連業界人士都同佢講有好多不滿,但係佢都係轉身射個三分波就投咗贊成票。不過佢之後都有講返,話投贊成只係為多謝政府寫報告嘅辛勞咁解啫。

 

  不滿報告但係投贊成票,Jenny就覺得係奇怪咗啲㗎喇!唔知係唔係怕得賢仔一個唔夠說服力,連民建聯元老、前立法會主席曾鈺成,今日都係報章專欄到講多幾句噃!

 

曾前主席嘅「地圖炮」,都唔係第一次發射喇!

 

  曾前主席分析話,建制派全投贊成票,係表示對行政長官嘅支持,「即使他們不是毫無保留地同意施政報告的全部內容」。佢仲話,非建制派嘅考慮就要複雜啲:佢哋唔想投贊成票,因為會畀人覺得佢哋對施政報告全面支持,尤其當報告包含了某啲佢哋強烈反對嘅內容,但係又有啲建議係佢哋選民都歡迎嘅,所以就有棄權票或者缺席喇。

 

曾前主席「地圖炮」,建制泛民均被炸

 

  曾前主席仲話,以前提修正案,係議員表達意見嘅一種方式,但而家已經基本上失去作用:「非建制派提修正案,大都只為了表示『遺憾』、『不滿』等情緒,很少提出實質意見;建制派則認為提修正案只是反對派的政治動作,所以他們不提出任何修正案,只否決所有修正案。」言下之意,似乎係講緊建制同泛民之間仍然係處於角力狀態,無論對家講咩,雙方都唔肯讓步噃!

 

  不過曾前主席都唔係第一次指出建制泛民之間呢個敵我分明嘅狀態㗎啦!上次兩派拗「一地兩檢」拗到面紅耳赤嗰時,曾前主席都同樣出咗篇專欄,話大家「寧為喪屍,勿站錯邊」。一次過向建制泛民兩邊發射地圖炮,唔知邊一邊傷啲呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新etnet健康網購,送你【健骨維他命D3(1000IU)】乙樽(價值$108)► 立即行動!

更多言歸政傳文章
你可能感興趣
#施政報告 #致謝議案 #立法會 #曾鈺成 #何俊賢 #建制派 #民主派 #民主派 民建聯 #漁農界
編輯推介
即時報價
全文搜索
Search
最近搜看
雙幣交易
財政預算案2024-25
More
Share