政府日日「大灣區好」、「大灣區勁」、「大灣區無得頂」咁Sell，原來唔係淨係同港人Sell，都會同內地人Sell㗎！今日Jenny就發現政府打算請WeChat小編，仲開價成7萬8一個月添！齋睇牌面係幾筍！不過唔好諗住真係淨識玩WeChat就得喎！

首先你要……唔好太後生!

　　根據公務員事務局嘅招聘網站，呢個Post叫「社交媒體主管」，職責係開設及管理粵港澳大灣區微信專頁，向內地推廣香港對推進大灣區建設嘅展望。Jenny聽落去都覺似係啲普通小編會做嘅嘢，但係啲要求就唔係普通小編咁簡單，因為除咗了要有「香港任何一所大學頒發的中文系或新聞系學士或更高學位，或具備同等學歷」，仲要有10年經驗先做得吖！永遠係「青春少艾」嘅Jenny就算對份人工有啲心動都冇得去馬……

只得一年合約期

　　話明要向內地推廣大灣區，所以除咗要識做小編之外，如果「持有工商管理學系或市場學系碩士或更高學位」，同埋「具備與內地傳媒行業相關的管理工作經驗」嘅話仲有得優先考慮添！但係留意返，話就話係政府請人，就算成功受聘，都只係會簽「非公務員合約」，為期一年，所以其實呢份「政府工」都唔係太穩定㗎咋！

　　By the way，Jenny就啱啱醒起，香港人玩開WhatsApp、Facebook，熟手玩WeChat嘅人就唔太多，加上對象係Sell內地人而唔係本地人，呢個位，或者最後都係內地專才嘅囊中物……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇