近排Social Media冇啦啦興起玩「#10yearschallenge」呢個挑戰，Jenny有唔少姐妹都Post自己10年前同而家嘅相比較，Jenny睇到都覺得唔少回憶返晒嚟吖！　

 

　　懷緬過去嘅又點只係普通市民呀，Jenny呢兩日就見到有啲緊貼潮流嘅政治人物，都有玩呢個挑戰噃！就好似「大嘥鬼」局長黃錦星、香港眾志嘅黃之鋒、新民黨容海恩都有玩啊！

 

 

 

「大嘥鬼」局長秀髮曾經濃密過

 

　　不過人大咗，淨係放十年前嘅相可能都唔係好大分別，所以黃局長直情放咗成40年前咁滯嘅相出嚟。睇吓當時局長嘅頭髮幾濃密！唔知當時嘅佢，有冇諗過自己30幾年後會做咗局長呢？而黃之鋒十年前都未踏足政壇，應該仲係一個準備升中嘅小朋友嚟！

 

 

 

恩恩豬似泳兒 聶德權「十年如一日」

 

　　至於有人話佢係「法律界桂綸鎂」嘅新民黨容海恩（恩恩豬），當年就仲係一個「桂綸鎂頭」，但係Jenny就覺得恩恩豬嗰陣時個樣似歌手泳兒多啲噃！不過對比起都係佢上年結婚張相靚啲，幾時都話新娘子係最靚㗎嘛！

 

 

 

　　而恩恩豬嘅師傅葉劉就冇佢咁緊貼潮流，但係就有人幫佢整咗個Post喎！仲要係「#20yearschallenge」添！Overall都算Keep到啊！Jenny認為不能只有我看到，梗係要同大家開心Share！ 

 

 

 

　　但講到「十年如一日」就唔夠政制及內地事務局局長聶德權Fight！望望佢張相，真係可以話係噚日影嘅都有人信呀！Jenny估係咪因為做得運動多身體好，連樣都Keep得青春啲呢？　

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情