一跪再跪！講緊嘅就係今日勞福局局長羅致光又褪軚，喺立法會福利事務委員會特別會議入面宣布，會暫緩60至64歲人士唔參加自力更生支援計劃就扣$200綜援的安排。數數手指，政府今個月已經「跪」咗4次喇！

政策推多錯多 跨黨派鬧爆

　　老實講今鋪真係唔知邊位「天才」諗到扣$200呢招，又搞到全城鬧爆。等Jenny同大家數吓政府今個月點「跪」足4次啦！收緊長者綜援申領年齡呢個政策，特首林鄭一開頭仲牙刷刷咁話係「各位議員批㗎」，結果同建制密密斟之後，就「跪低」話畀返個差額啲受影響人士；本身諗住咁就拆咗一個炸彈，點知轉頭「三隧分流」無約束力議案上立法會又受到跨黨派反對，最後都要喺臨上立法會前一日撤回議案……

　　另一邊廂，派4000蚊嗰邊又搞到一鑊泡咁。一份表要夾身份證副本、銀行卡副本、住址證明，仲要用郵寄或投遞箱而冇得網上申請，搞到市民一頭煙，政府結果又係要改口，話冇住址證明都得、貼唔夠郵票亦得！政府咁樣彈出又彈入，Jenny表示真係好忙吖！

勞福4中3 局長跪到腳都軟

　　4次「跪低」入面，勞福局就佔咗3次，1月都未過，阿羅局長膝頭哥已經損晒喇！無他嘅，今次所涉及嘅全部都係民生嘢，適逢今年區選兼下年立會選舉，就算做開忠實Fans都唔可以攞選票嚟「較飛」㗎嘛！唉！政策與其咁朝令夕改法，點解唔推出之前諗得周全啲呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇