相信大家都聽過「熊貓外交」，熊貓咁鬼Cute，絕對人見人愛!而家移民世界各地嘅大熊貓一直都係當地人寵兒，如果有熊貓B出世，好多時都會攪命名比賽，與民同樂吓吖嘛!今次就輪到德國栢林動物園有兩隻大熊貓出世，有報章就叫讀者畀吓建議同投票，叫「香」同叫「港」最多人投，點知仲有人竟提議叫「周庭」同「黃之鋒」?咁玩法?因住阿爺嬲豬啊!

德國人最like 「香」、「港」

　　話說由成都移民德國嘅大熊貓「夢夢」月頭生咗對孖B，係中德大熊貓國際合作史上首次有熊貓B出世，當然要賀一賀佢啦!當地《每日鏡報》（Der Tagesspiegel）就攪咗個熊貓BB命名投票。

　　或者因為近幾個月香港因為修訂《逃犯條例》示威，令到國際社會高度關注啦，「香」(Hong)、「港」(Kong)成為得票出最高票嘅兩個名，跟住就係「陰」(Yin) 、「陽」(Yang);「乒」(Ping)、「乓」Pong;「Plisch」、「Plum」仲有「 Max」、「Moritz」。最玩嘢係有德國人提議不如叫「周庭」(Agnes Chow Ting)同「黃之鋒」(Joshua Wong Chi-fung)吖!係呀!眾志嗰兩個呀!

熊貓B最快兩年後返鄉下

　　點都好啦!呢個只係民間投票，都係要留返畀動物園決家用唔用嘅!如果用咗的話，根據動物園同中方協議，2至4年之後，「香」、「港」大個仔，最後都係要回歸祖國懷抱!又幾乎合歷史喎!不過今次係由德國而唔係英國移交。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇