收藏文章 

2017-12-29

2018乜都加 新一年加價位同你逐個捉

  噚日Jenny先同大家八完今年民建聯嘅年度漢字係個「貴」字,反映市民覺得百物騰貴嘅心聲。不過去到下個星期一就踏入新一年,又有唔少嘢都要加價喇!Jenny今日就同大家細數有啲乜係即將加價啦!準備好銀包未?

 

咩都加,係人工仲未有得加......(設計圖片)

 

兩電齊加1.9%

 

  第一個就係大家都會用到嘅電費,而且今次係港九新界都冇得避!皆因中電同港燈將會喺元旦起一齊加價1.9%。加價之後,中電淨電費由113.2仙,加到去115.4仙;港燈就由110.4仙加到112.5仙。經過咗兩年減電費嘅「蜜月期」,睇到佢下年要加返價,Jenny都感覺到淡淡的哀傷,聽講港燈本身仲話想加雙位數添!不過呢個諗頭一出就過唔到林鄭嗰關,仲被窒:「點解中電做到(加單位數),港燈唔得?」所以先向中電睇齊,加1.9%咁大把!

 

郵費個七加到兩蚊

 

  第二個就係郵費啦!郵政署話,由元旦日起,30克或以下的本地信件郵費由1.7元調整至2元;平郵郵件20克或以下寄往中國內地、澳門和台灣的信件郵費由2.2元調整至2.6元,而寄往其他地區的郵費由2.8至3.7元調整至3.2至4.8元;空郵郵件20克或以下寄往中國內地和台灣的信件之郵費由2.9元調整至3.4元,而寄往其他地區的郵費由2.9至3.8元調整至3.7至5元。

 

  其實郵局對上一次加價已經係2013年嘅事,再加上而家加咗都只係兩蚊,就有專人(郵差叔叔)服務,Jenny覺得都幾合理嘅!不過Jenny在此要提提之後要參加補選嘅朋友,寄宣傳單張就要記得貼夠兩蚊郵票,等郵差叔叔送信純熟迅速送出喇!如果郵資不足又冇回郵地址,封信就會被銷毀,到時小妹就算識法術都幫你唔到喇!

 

泊車位未加先加泊車費

 

  第三個係泊車費,房委會轄下151個停車場、3萬個車位,同埋港鐵商場停車場都會加價。房委會轄下嘅私家車泊車位時租加1蚊,日泊就加5蚊,輕型貨車就加2蚊。而月租停車場就會加6%租,露天泊車位同有蓋車位月租都係加6%左右。仲有港鐵商場啲停車場,時租都一樣要加1至6蚊。不過啲議員成日同小妹呻個個區嘅泊車位都唔夠,就算加價,睇嚟啲車主都係要焗食㗎啦!

 

海洋公園︰加9.6%

 

  除咗「老鼠公園」迪士尼喺今個月加咗價之外,香港另一個主題樂園──海洋公園都喺元旦加價喇!成人日間飛將會由438蚊加到去480蚊,小童飛就加到240蚊,加幅係9.6%。不過據Jenny所知,香港居民直到2月28日都仲可以用原價買飛,想去嘅朋友就要趁早啦! 

 

私院生仔都要加

 

  而家生存已經好「貴」,連生仔都唔平㗎!兩間私家醫院話將於下年加價,以養和為例,除咗私家房外,普通房同半私家房嘅分娩套餐收費都會加價,當中加幅最大係普通房,3日2夜自然分娩套餐將由現時19,200蚊,加到2萬2300蚊;而5日4夜剖腹分娩套餐都加到2萬8800蚊,仲有附加服務費都要加添!而荃灣港安都有新收費,1人房由2萬8800蚊加到3萬2500蚊,而剖腹分娩計劃1人房、優質私家房、尊貴私家房分別要加差唔多10%至16%!Jenny成日聽到人哋話養一個小朋友要400萬,嚟緊元旦之後,如果想去私家醫院生仔嘅話,都至少要擺低兩、三萬嚕!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多言歸政傳文章
你可能感興趣
#私家醫院 #加價 #海洋公園 #郵費 #兩電 #電費 #中電 #港燈
編輯推介
即時報價
全文搜索
Search
最近搜看
雙幣交易
聚焦兩會2024
More
Share