張華峰（肥老闆）講嘢有濃厚嘅口音就係人都知，Jenny表示有時會冇字幕都聽唔明佢講乜！不過Jenny成日都要去立法會聽佢哋開會，無字幕就要運用自己嘅努力，再加多少少想像力，去Get吓佢講咩啦！

肥老闆講「大亞灣」 琼子偷笑

　　今日有特首問答環節，肥老闆今日都夠手快有得問，不過就全程揸住張紙。佢一路讀：「阿特首，我留意到你就香港如何參與『大亞灣』規劃方面……」、「協助推動『大亞灣』的金融發展……」

　　咪住先！「大亞灣」？黑人問號？小妹心諗香港參與嗰個唔係大灣區規劃咩？定係肥老闆一早洞悉先機，得知香港都要去發展核能，所以要協助推動大亞灣「金融發展」？之但係肥老闆一本正經咁讀稿，Jenny就留意到佢身後嘅李慧琼竟然偷笑！

林鄭搭到咀 新聞處幫手改正

　　Jenny不得不讚特首林鄭轉得快，竟然又搭到咀㗎噃：「我們的金融業界在內地，特別先在大灣區裏開業的情況……」、「這個肯定是香港特別行政區參與粵港澳大灣區的策略和目標……」不過林鄭就冇即時指正肥老闆，而政府新聞處向傳媒出返個答問全文，都順便幫肥老闆「改正」返做大灣區添！但係呢啲紀錄唔係要照單直出嘅咩？肥老闆獲政府新聞處幫手改正，真係有Face喇！肥老闆下次咪再講錯喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情