加入最愛專欄  收藏文章 

2018-06-15

英明的主席大人!

  備受爭議嘅一地兩檢議案,終於喺噚日(6月14日)喺立法會三讀通過。一條史無前例嘅法案,竟然只係用咗短短三十幾小時就能夠通過二讀同三讀,歸功於英明嘅「主席大人」梁君彥。

 

  「主席大人」喺今次審議過程之中可以話係技驚四座。首先同讀者講解少少,法案審議過程之中,一般最重要就係二讀加埋全體委員會審議階段,議員就係喺呢個環節唇槍舌劍,大家表明申述自己嘅立場,或者希望說服其他議員跟從自己嘅立場(可以的話…),而本身議員只要唔重複發言內容,理論上係可以無限次發言,每次講足15分鐘。

 

  偉大嘅「主席大人」就定咗二讀只可以用8小時、全體委員會審議有22小時。8小時咩概念?每名議員講足15分鐘的話,只係得30人可以喺二讀發到言去支持或反對議案。8小時過咗之後,大家諗住全體委員會審議可以有22小時講足,陳志全議員亦喺星期三多次追問「主席大人」係唔係有22小時,點知英明嘅「主席大人」三兩撥千斤,重複咁話「辯論嘅時間安排我已經在信上講得清清楚楚」,點知到星期四,主席立即重新擺陣,大幅削減辯論時間,最終又係有更多議員,無論係反對派或者建制派都無辦法喺呢個環節發言。最終再經過6小時嘅三讀,呢條充滿爭議嘅議案就咁快刀斬亂麻之下通過。

 

  Tina聽聞唔少建制派對於「主席大人」英明決定都咬牙切齒,因為今次係一次表忠嘅好機會,大家都想同西方同北方交功課,點知「主席大人」嘅限時辯論,令好多議員都講唔到又或者鬧反對派鬧得唔夠痛快。更加有建制派私下透露,雖然議案過咗表面上主席係立咗最大功勞,但期間表現除咗硬崩崩咁話「主席裁決係不容辯論」、「我已經解釋清楚,你有問題歡迎會後來問我」之外,真係見唔到佢有曾鈺成、范太咁樣以理服人嘅言論,表現其實係乏善足陳,所以都有人計劃打佢小報告。

 

  但無論如何,今次「主席大人」嘅英明,唔多唔少喺西環來看係加咗唔少分,更加為未來立23條、國歌法等等具爭議法案,定下一金剛箍箍死反對派,等有爭議嘅法案可以快快通過,唔使再出現拉布。縱然「主席大人」手段唔多高明,但實際效果卻係非常英明!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

更多立會透視鏡文章
你可能感興趣
#立法會 #梁君彥 #一地兩檢
編輯推介
即時報價
全文搜索
Search
最近搜看
雙幣交易
貨幣攻略
More
Share