藍天麗日的夏天、寧靜無波的早晨。

 

　　突然平地一聲雷！

 

　　老友的丈夫突然來電求救：「大件事，我而家喺公司，女朋友啱啱打電話嚟，話佢衝緊上我屋企，搵我老婆講數！」

 

　　「你用五秒交代吓事情始末。」我立刻啟動危機應變機制。

 

　　「因工作關係，識咗一間工程公司嘅新紮師妹，大家成日一齊趕工，所以產生咗好感。」

 

 

　　「上咗床未？」我單刀直入問。

 

　　「上咗。」

 

　　「你愛唔愛佢？」

 

　　「而家唔愛，當時發咗瘟！」

 

　　「你愛唔愛你老婆？」

 

　　「愛。」

 

　　「即刻收線！你等核爆完先番屋企。」

 

　　我立即打電話畀老友。

 

　　「Susan，你現在定D，聽住！你老公因工作關係，同一個女仔發展咗段短暫嘅關係，而家個女仔殺緊上你屋企講數。你老公話愛嘅係你，我相信佢係真心嘅。如果我係你，會攬住個老公。」

 

　　她停了兩秒，答：「清楚。」

 

　　我可以想像一定有好戲，因為小三夠狠，大婆夠穩。

 

　　後來從她口中，重組現場戰況。

 

　　那女子直搗敵方主場，句句激心，巨細無遺地描述她如何與這男人交心兼交媾，然後話：

 

　　「佢個心已經唔喺你度，你放佢走啦！」

 

　　誰料Susan竟然和顏悅色地答：「大家都係上帝嘅子女，上帝都赦免我地D罪人囉，我當然原諒我老公啦！我地應該以愛擁抱每一個人，我好想你做主內嘅姊妹，不如你跟我去禮拜堂，讀吓聖經吖！（下刪一千字）」

 

　　小三敵唔過大愛，結果「妖」一聲砰埋大門走咗。其實Susan並無宗教、衹有好蹺。

 

　　Susan額頭廣闊、下巴有力、眉目清楚、面相開揚，加埋身材都好穩陣，兩頭戙得穩，擺明情緒穩定、EQ高。這事擺平以後，她絕口不提。此後男人對老婆加倍的好，自此有影皆雙。

 

　　化解這危機，是借神的力量，也靠人的智慧，還有，是胸襟，原諒罪人是有福的！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

WoW WoW星期三：健康網購產品低至$99 (只限今天)► 立即行動