打工仔希望返工有彈性上班時間，女士就希望皮膚幾時都有彈性，但對今次有份採訪回歸20周年活動嘅行家來講，佢地最頭痕可能係嗰個充滿「彈性」嘅保安區同埋「彈性」十足嘅採訪安排。好彩！消息人士已經「通水」畀Jenny，話習大大今次訪港行程緊密，唔會落區做家訪，叫我唔使咁頻撲。

 

習大大唔家訪 保安區都係咁擴

 

　　警方今日就習近平訪港事宜及七一煙花匯演等各項保安活動嘅安排開記招。警務處助理處長（行動）鄭耀武話，今次習大大訪港的活動範圍較以往大，所以警方劃出嘅保安區同樣是近年同類活動中最大。咁究竟又幾大呢？係咪大到由灣仔過到對面海呢？鄭Sir就一於封口，只係話保安區的確實位置及實際範圍都不便公開，因為有保安理由，總之就會隨住警方不斷嘅評估，擴大、縮細、再擴大、又縮細......咁啦。有必要時仲會忽然之間出現。

 

　　好多人都擔心劃咗做保安區嘅地方，係咪蚊都唔可以飛一隻入去呢？非也！鄭Sir同Jenny講，其實大部分時段普通市民都可自由進出保安區，市民返工返學理應不受影響，直至習大大響附近現身先會臨時封閉，叫大家放心。之不過，保安區內係嚴禁示威，當保安區範圍如此彈性，封閉時間又咁飄忽，其實幾困擾響會場外圍做嘢嘅記者，皆因最簡單嘅就係，行家們都希望可以第一時話畀讀者知佢哋身處之地係唔係保安區又會唔會封閉，令大家安排交通、約人都可以更有預算。

 

當行家們知道個保安區係咁有彈性嘅時候......

 

冇Order畀前線要提防敏感字

 

　　早前外界一直盛傳，前線警員已收到Order、要提防敏感文字或者圖像喺領導人視線範圍內出現，萬一如有市民著住或者拎住有暗示敏感話題嘅衫同物件，會唔會又畀人阻止進入保安區呢？鄭Sir說即刻澄清，高層冇畀到亦唔會畀上述嘅Order前線警員，仲話「市民著衫有個人自由」。

 

　　而今次示威區安排喺保安區以外，咁示威者咪冇可能見到習大大，訴說衷情？鄭Sir即刻話：「其實見唔見到主席係唔相關」，行家當然起哄啦，如果示威者見唔到示威對象，咁示威就冇意義，不如返歸好過。鄭Sir只好解畫，因為習大大是「受保護目標」，示威區喺邊，完全只係基於保安考慮，為咗確保安全，佢地冇諗過示威者係要見到習大大呢一層。各位有意示威的人士，嗰三日如果真係出動，要有心理準備即使用超級大聲公，習大大都未必可以聽到你嘅聲音。

 

核心內圍採訪區 習大大會在嗎？

 

　　示威者想見習大大一面難，咁記者呢？仲記得2012年時任國家主席胡錦濤訪港時，有記者因問佢點睇六四之嘛，畀人帶咗離場。所以行家們都好驚今次萬一又問咗一句警方覺得「唔對路」嘅問題之後被夾走咗咁點算好？

 

　　警察公共關係科（俗稱P記）總警司霍樂生就話，警方唔會就個別行為評論，趕唔趕走一個記者，好視乎當時環境同埋嗰個人整體行為，如果覺得記者有採訪以外目的就請佢走，Jenny覺得都有道理吖，但再追問落去，霍Sir都係唔願透露點樣衡量，真係夠晒「彈性」。

 

　　仲有！仲有！雖說採訪區喺核心保安區入面，但警方冇正面回應究竟記者們可唔可以見到習大大嘅樣，甚至係令佢可以聽到記者嘅問題呢？鄭Sir只係講「核心保安區」內，係「好有利嘅位置」。Jenny 覺得，如果習大大冇辦法聽到記者嘅問題，咁樣記者去採訪區同示威者去示威區一樣，都冇意思個噃。嗱！鄭Sir你唔好呃我呀！

 

百人傳媒聯絡小隊照顧記者

 

　　大家去完記招都仲有好多嘢得唔到答案，之後Jenny就問返P記朋友仔，佢話由於知道會有大量中外記者為咗採訪習大大而來，當日P記會派出過百人嘅傳媒聯絡小隊去照顧記者，人手多過上次張德江來港時嘅80幾人，幫記者解決問題、帶記者去記者區，同埋調停記者同前線警員之間的爭執。佢仲講笑咁講，當中有不少人是「幫辦」級，對應外國傳媒絕對游刃有餘咁話。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇