世事政情

2017-11-21

馬明慘遭阿Bob硬奪「男男初吻」視迷︰陰公豬！

　　【晴報專訊】馬國明與阿Bob（林盛斌）前晚演出台慶趣劇時，慘變hehe激咀戲，林曉峰手多多撮合二人在觀眾面前大玩「世紀之吻」，片段成功在網絡洗版，令各界O嘴。事後馬明大方讚阿Bob唇厚又軟熟，更自爆被奪去與男人的初吻。不少觀眾盛讚二人玩得放，睇得開心；有花生友則寸爆畫面恐怖，巧驚驚！

　　無綫50周年《萬千星輝賀台慶》前晚圓滿落幕，趣劇環節「50周年藝員訓練班面試日」成為全晚焦點。該環節除了有陸永惡搞成為A貨Do姐（鄭裕玲），獲網友派Like外，近日憑台慶劇《降魔的》被封為視帝大熱的馬國明，與阿Bob化身《上海灘》的許文強與馮程程亦成功搶Fo。

林曉峰夾硬推馬明和阿Bob的頭，令兩人咀嘴，這幕驚嚇場面嚇得台邊的心穎BB尷尬擰歪面傻笑。

　　當中男扮女裝的阿Bob，化身肥版馮程程玩驚嚇，馬明則扮許文強，他見到對手的樣子時也忍不住說︰「程程，你去咗核電廠度做呀？你好似中咗好多輻射咁喎！」其後，馬明應阿Bob要求即場示範招牌「天然呆」賣萌樣，率先贏盡掌聲。不過，為求製造氣氛，二人身後的林曉峰竟忽然夾他們的頭嘴對嘴，激咀維持近兩秒，場面極重口味，同時亦令全場譁然。馬明緋聞女友黃心穎被鏡頭捕捉到尷尬失笑，表現無奈。

自言唔敢睇Playback

馬明對住鏡頭做出招牌天然呆如樹熊的表情，即時被網民無限cap圖。

　　二人的台慶激咀一幕，一夜間於網上瘋傳，很多粉絲替馬明及心穎BB心痛之餘，卻激讚效果一流；有網友則認為台慶夜兩男在鏡頭前咀嘴，令人難以接受。事後，馬明受訪時直言料不到林曉峰玩得咁盡。他說︰「我以為側下、側下、避下、避下就完，錫都無諗，不過阿Bob都幾好嘴，佢個唇厚又軟熟！大家有機會可以試下！（唇厚過心穎？）你咁講我即刻無聲出！」提到鏡頭當時隨即轉向心穎，馬明笑道︰「正常，她應該都天然呆啦，我都不敢再睇番錫阿Bob，我錫男人嘅初吻咁樣畀阿Bob奪咗！」