過往專欄

2018-02-20

林鄭現身港交所敲鑼利是究竟會派幾多？

#劉怡翔 #陳茂波 #財政預算案 #紅盤 #金銀滿屋 #金銀業貿易場 #港交所 #香港金融大會堂 #林鄭月娥 #connect #同行 #派利是 #公職人員 #特首 #理財 #股票

　　開工大吉！唔知各位讀者大家今日係唔係年初五咁嘅樣？凡事都有兩面，一方面長假過後要返工，心情灰難免；另一方面Jenny今日已經一早整裝待發準備逗利是喇！即使唔係中國人嘅外國朋友仔都有派利是畀小妹㗎！

一年一度的交易所新春開市今年有林鄭又有陳茂波。(政府新聞處圖片)

狗年開市日敲鑼有林鄭又有陳茂波

　　今日最重要梗係紅盤高開啦！早上先去好好意頭金銀滿屋嘅金銀業貿易場開市儀式，之後再去港交所嘅香港金融大會堂開幕禮暨新春開市儀式！話晒都係特首林鄭月娥首次以行政長官的身分出席一年一度的交易所新春開市，之前多數都係派財經事務及庫務局局長做代表出席，不過今年開市日係有啲唔同，皆因仲係香港金融大會堂啟用嘅大日子！同場仲有財政司長陳茂波，同埋財庫局長劉怡翔添。

　　林鄭自己都話，三個幾月前先見證運作咗30年嘅交易大堂退役，短短不足四個月期間，交易所已經將以前嘅交易大堂轉變成為一個金融大會堂。仲不忘喺咁多人面前大讚同多謝港交所主席李小加(Charles)，「效率值得令人讚賞！」。

預算案派幾多「糖」林鄭冇風放

　　現場咁多財金界人士，林鄭都知大家最關心月底公有嗰份《財政預算案》，不過佢就冇咩風放畀大家聽，只係講咗句「金融市場裏的成績非常好，大家都賺錢嘅同時，財政司司長亦有不少收入……」再加句「在投資的同時大家真係要管理風險，因為世事常變。」Jenny 就估林鄭係想講庫房好多收入？至於世事常變喇喎，歌都有得唱：「知否世事常變，變幻原是永恆」小妹覺得對市民來講庫房「水浸」，「派糖」就是永恆不變硬道理。

　最後，林鄭仲不忘再拎佢競選的口號－－「同行」出來同金融大會堂拉拉關係，此話何解？因為佢留意到今日開幕嘅金融大會堂英文名就是HKEX Connect Hall。林鄭話「Connect」有雙重意義，既係連繫，即係佢上年嘅競選口號，所以佢話特區政府嘅同事亦將與金融業同行，為港開創一個更美好的前景咁話！