畢業後投身職場，好似周不時都會聽到身邊人話，「千祈咪同同事拍拖呀！死硬！」呢種感覺就好似，繼「中學生不應談戀愛」後，人生又多咗一條新嘅「戀愛禁忌」。其實打工仔喺公司日做夜做，同同事朝見口晚見面，真係好易產生感情，避都避唔到！與其「斬腳趾避沙蟲」，不如認真諗下有乜方法去維繫一段健康嘅辦公室戀情仲好啦！

 

　　適逢今日係七夕，小編喺度同大家講聲「情人節快樂」！冇情人？咁祝你有個Happy Friday！

 

（《愛·回家之開心速遞》截圖）

 

1. 保持低調

 

　　拍拖初期，通常你哋嘅眼中只有對方存在。但記住公司喺工作嘅地方，所以切忌愛得太高調，頻頻喺同事面前放閃曬恩愛，咁樣亦都係避免你哋嘅戀情成為同事之間茶餘飯後嘅八卦！但要留意，保持低調唔代表要隱藏戀情，事關大家身處同一個office，更甚至是坐正你哋嘅前後左右，唔通真係會睇唔到戀人之間嗰種不自覺嘅眉來眼去咩！

 

2. 和同事多互動

 

　　雖然拍拖係兩個人嘅事，不過要記住，你哋喺公司係返緊工，係同一班「手足」一齊搏殺緊，所以比起爭取二人世界嘅時間，和同事們嘅互動就更加重要，而且咁樣做仲可以減低同事對你哋公私不分嘅質疑！

 

3. 唔好將私怨帶返office

 

　　同事之間唔妥對方未必會擺上臉，但情人之間吵架鬥嘴，就絕對係隔幾個位嘅同事都會feel到。所謂「私人恩怨私下了」（雖然知易行難！），因此奉勸你哋一句，喺拍拖初期，大家就要有晒共識點去處理呢段戀情，唔好有朝一日因私怨而喺office吵架，之後唔知點解傳到去腦細嗰度，咁就分分鐘連份工都冇埋！

 

　　想知你最容易被邊種同事吸引？即刻試玩下一頁個心理測驗！

 

• 

etnet榮獲HKEX Awards 2023 「最佳表現證券數據供應商」大獎► 了解詳情

• 1
• 2
• 3