吃喝玩樂

陳世味道 - 陳俊偉

加入最愛專欄　收藏文章　

2021-02-11Photo: 由作者提供

農曆新年大進擊！超值中菜外賣＋勁多嘢玩Staycation

　　疫情為患，正苦亂封，市道好差，飲食難做，因此農曆新年外賣套餐競爭好激烈，大家都想在大時大節取到一點生意；香港美麗華酒店的國金軒，推出4位用農曆新年外賣套餐，就竟然賣緊$988起——即是人均大約$250呀！你能相信這是酒店價嗎？

　　當然$988只是「基本價」，套餐內有些用料比較名貴的菜式，是須要額外補錢，我就根據自己口味挑選了以下：

- 頭盤：象拔蚌錦繡撈起（4-6位用/＋$720）

- 湯：螺頭湯（+$80）＋花膠湯（+$120）

- 賀年菜：豉油皇香煎4大隻珍寶花竹蝦

- 海鮮：四川酸菜煮沙巴龍躉

- 主菜：古法陳村棗皇蒸三黃雞＋古法枝竹羊腩煲（+398）

- 飯：砂煲臘腸排骨煲仔飯（+198）

　　頭頭尾尾加埋大約總共$2,500，以4位用（其實5人用都夠㗎）的五星酒店中菜來說，這個價錢一點都不貴。

象拔蚌錦繡撈起，味道清鮮爽口，加上今年天氣不太冷，是很適合的農曆新年冷盤食品。

吃象拔蚌錦繡撈起，無非為了好意頭，祝大家一齊撈起，去年唔起今年都大起。

大大盅螺頭湯，肯定夠飲，水準亦不錯，趁農曆新年滋補一下。

　　當菜式變成外賣，質素都具考驗，而根據我這次經驗，所有菜式交出成績，撈起味道清爽又分量十足，珍寶花竹蝦超大隻啖啖肉，沙巴龍躉的肉質夠嫩滑，但都是蒸三黃雞最合我心水，出乎有點預料的美味，雞肉調味佳又蒸得剛剛好，吃剩的打包隔兩天再翻熱享用，都依然覺得好味道。

豉油皇香煎4大隻珍寶花竹蝦，如果是單點菜式，你估要收幾多錢？

珍寶花竹蝦真的超大隻啖啖肉，大家一邊吃一邊勁讚好抵食。

四川酸菜煮沙巴龍躉，圖片看不到沙巴龍躉，皆因已完全起肉，讓客人食得好方便。

古法陳村棗皇蒸三黃雞＋古法枝竹羊腩煲＋砂煲臘腸排骨煲仔飯，單是這裡都夠4人享用。

　　羊腩煲也是不錯的，肉質掌握得宜，只是閣下喜歡與否要視乎觀點與角度，始終酒店中菜不可能把羊肉做得太羶，加上此羊腩煲不含羊內臟，因此未必能完全滿足追求重口味的羊腩煲硬粉。

古法枝竹羊腩煲，羊肉處理得幾好，肉質剛剛好，亦不太羶。

　　煲仔飯則是最tricky的部分，做外賣是沒法keep住熱辣溫度，煲內焗著的蒸氣還會令飯粒帶點點濕氣，幸好煲底的飯焦好強，好飯焦者會好開心，當作鍋巴沾羊腩汁或者用來「兩食」做茶漬飯都很適宜。

砂煲臘腸排骨煲仔飯的飯焦，真的很誇張，可以整塊剷出來當鍋巴沾醬。

　　如果這個農曆新年套餐包含少少甜品，例如幾件桂花糕、紅豆椰汁糕，用來清一清味蕾，就更perfect嘞，不過依家都已經好抵食，好難再complain。

　　講開香港美麗華酒店，在Staycation方面都異常進取，較早前把位於第17樓的客房樓層變成一整個playground，每間房提供不同娛樂和活動，包括飛標、足球機、籃球機、兒童遊戲、VR遊戲、任天堂Switch等等，全部限據現時限聚令只容2人，期間並會進行消毒清潔，在所有康體娛樂場所全被關閉的社會環境之下，這個樓層頓成一個很好的City escape。

　　最新增添的娛樂活動房間，是——登、登、登——私人家庭影院，以極致音效系統DEVIALET配合Phantom揚聲器，配合大張豪華兼可傾科的真皮座椅，打造電影院的視聽體驗。我當日就收看配樂非常特殊的《天能》（Tenet），多得音響設備優良，令我獲得高度享受。其實我也想收看經典驚慄名片《閃靈》（Shining），但同場朋友比較細膽不敢看……下次再來過。

新開設的私人家庭影院，以極致音效系統DEVIALET配合Phantom揚聲器，還有大座椅。

私人家庭影院內有3部Phantom揚聲器，音響效果真的變得非常不錯。

　　之後我去另一房間玩VR遊戲，戴上頭盔拿著手槍打喪屍，同行朋友說以前在日本常常玩這類活動，現在沒法出外旅遊，今次就「玩咗當去咗」重溫日本感受。此外我也有到飛標房，本來只打算擺甫士拍照，怎料拿起飛標試試，就像上癮一樣不停玩，結果掟足1小時，還竟然掟中紅心6次啊！此時我才發現，或者我是有掟飛標的天能啊！