【晴報專訊】華語樂壇年度音樂盛事「KKBOX風雲榜」頒獎典禮，今年移師來港，將於3月12日假灣仔會展舉行。張敬軒、陳柏宇、曾樂彤等昨日出席記者會，身任香港演藝人協會副會長的軒仔，自言工作太忙，去年對演協貢獻不大，反大讚會長古天樂盡心盡力，希望他能連任。

　　張敬軒昨日獲頒KKBOX「十大風雲歌手」，連同之前各大頒獎禮的獎項，共奪得16.5個獎。軒仔表示十分期待三月的頒獎禮，他說︰「以往參與呢項音樂盛事已經好多年，佢哋嘅舞台設計媲美大型演唱會，質素相當高。其實香港舉行頒獎禮仲有好多限制，反而外地公司主辦就無咁多掣肘。」

　　早前軒仔透露演藝人協會有意籌辦一個具公信力的音樂頒獎禮，他表示可以借鏡KKBOX頒獎禮：「其實本地任何機構要舉行頒獎禮都唔容易，當中涉及太多商業因素，亦唔係一、兩年內可以成事。」他透露演協今年底至明年初將會換屆，他提前表態支持會長古天樂連任：「古仔係大忙人，工作幾忙大家都睇到，但係佢都盡量抽時間定期同大家開會，有魄力好緊要。」他又指王梓軒、余安安等理事出心出力，相反自己因幕前工作太忙，對協會沒太大貢獻，問他可有信心連任？他說：「先唔好講係咪連任，作為本地演藝界一分子，都有義務去支持嘅。」

陳柏宇歌曲救好友生意

陳柏宇對去年的樂壇成績表十分滿意。

　　去年正式成為人父的陳柏宇，以父親心情寫主打歌《無限大》，其後推出第二首主打歌《認真如初》，盡顯他對愛情如一的態度。他在台上笑說，意想不到自己的歌，竟令好友的餐廳起死回生。他說︰「事緣呢位好友嘅生意本來唔太理想，直到佢喺店內播《認真如初》，生意突然好轉，總之播呢首歌，嗰日嘅生意就相當好，我諗隻歌應該改名叫《客似雲來》！」

轉載自: 晴報

etnet榮獲HKEX Awards 2023 「最佳表現證券數據供應商」大獎► 了解詳情