世事政情

2020-12-02

惡形惡相鄭家生好人難做

　　鄭家生入行41年，每次他在電影或電視劇中必定飾演黑幫社團大佬、殺手或者賊人，但私下的他卻是一位不酒不賭的慈父，跟兩個兒子的關係如朋友一樣。64歲的鄭家生不求名利，只盼望在工作上跟老友聚舊見面過日辰，閒時跟太太拍拖去旅行，享受半退休的生活。

　　鄭家生外表兇神惡煞，經常被安排演反派角色，而且非常「入屋」，香港人對他都非常熟悉。鄭家生小時候在舅父的戲班出身，12、13歲就跟元彪、元寶等著名武打演員一齊成長，他說︰「細個聽到有錢搵就去，習武無話辛唔辛苦，有工開就有錢，所以乜都死練爛練。」

做過狄龍爾冬陞替身

鄭家生在熱播的《使徒行者3》再次演黑社會角色，飾演金青社話事人大聖爺。(網上截圖)

　　家中有九兄弟姊妹，家生排行第四，大家都會自動自覺出外工作養家，從不埋怨，鄭家生就選擇加入龍虎武師和替身的行列。他說︰「雖然做龍虎武師感覺好粗聲粗氣，不過我哋好識得尊師重道。以前年紀大嘅前輩同導演，我哋都會好尊敬，唔會好似依家啲後生咁，連招呼都唔會打。做龍虎武師最重要係安全，以前連攝個墊都要匿埋唔好畀人見到，因為前輩會話︰『你咁錫身，唔想撈呀？』（受傷？）傷一定有，背脊位好多骨頭都凸晒出嚟。尤其係成龍同洪金寶年代嘅電影，條威也左纏右纏打圈，纏到亂晒再被佢哋一踢，反應都嚟唔切就被威也一拉即落地。」

　　鄭家生曾經為爾冬陞、狄龍等做替身，後來獲賞識走到幕前演戲，不過初時承受的壓力非常大，他說︰「三句對白畀我講，真係會好緊張，我寧願打十幾招，好彩後來慢慢適應。」入行多年，他自問沒有代表作，他說︰「代表作真係諗唔到，電影同電視劇都拍好多，只要劇本拎埋嚟我就演，做好個角色就足夠。（演極都係反派？）演咗幾十年都習慣喇，無話厭唔厭，幾十年來做過幾百個角色，只係黑社會就最經常做。我都想做好人，不過全部導演同監製都唔搵我做好人，一有黑社會角色就諗起鄭家生。」

　　在電影業蓬勃的年代，鄭家生曾獲邀離開無線往外闖，但他考慮到當時兩個兒子仍在求學階段，加上剛置業不久，便決定留守無線循龍虎武師、替身和演員三線發展。問到哪位演員的動作戲令他最印象深刻，鄭家生不加思索即答︰「劉德華，華仔真係犀利，見住佢訓練班出嚟，學嘢好快手，佢練得好，記性又好。」

《殺手》中，與歐瑞偉的對打場面十分精采，鄭家生笑言年紀大，所有動作只能盡力而已，不能勉強。（FB圖片）

　　現年64歲的鄭家生早前在劇集《殺手》的動作場面依然親身上陣，他說︰「依家係半退休狀態，我唔係十八廿二，仲打會好吃力，上咗年紀體力都變差，劇中同歐瑞偉對打，打到我嗌救命。兩個仔已經出晒身，我只係久唔久開工，見下老朋友，放假就同老婆拍拖去旅行。」鄭家生提到家庭時一臉幸福，雖然惡形惡相，但私底下卻是愛妻號兼慈父，他說︰「個個都愛屋企，我好隨和，對兩個仔唔惡，我嘅立場係你讀到書就讀，讀唔到就唔好留喺屋企，我唔養閒人，你自己去搵嘢做！依家兩個仔都有工作，自己搞掂自己，責任已經唔喺我度。（等湊孫？）咪搞，玩下就得。」

拒絕幫兩個兒子置業

去年《2019亞洲最具影響力盛典》中，與多位資深演員如陳榮峻（右一）及剛離世的曾偉權（左三）一齊得獎，而鄭家生（左四）獲得「最具影響力專業演員貢獻大獎」。（FB圖片）

　　鄭家生兩個兒子分別35歲和31歲，分別做汽車買賣和做生意，父子感情甚好，但他反對為子女置業，他說︰「家長買埋樓畀佢，又留嚿錢畀佢，咁佢咪廢人一個？當年我搏晒命做到嗌救命先有層樓，依家佢坐喺度等就有層樓？我養大你就自己搞掂啦，唔好諗住有身家畀你，層樓分分鐘將來我賣埋用嚟自己養老仲好。」他認為到了一定年紀，最重要身體健康，所以每日都會落街跑步，就算疫情下仍風雨不改，他希望可多活20年或以上，盡享福樂。