世事政情

2021-08-16

苦中作樂孖周秀娜拍MV狂遇不幸事件呂爵安喪食菠蘿包減壓

　　【晴報專訊】男團MIRROR成員呂爵安（Edan）上月尾推出新曲《小諧星》，邀得周秀娜（娜姐）當MV女主角。前晚Edan在自家YouTube頻道分享拍攝花絮短片，身為大忙人的他，開工時在「唔夠瞓」情況下克服多個難題，包括遇暴雨及缺乏時間練琴，他無奈道︰「今鋪真係E先生嘅不幸事件！」可幸MV至今錄得逾240萬點擊，可謂苦盡甘來。

　　Edan在今年初推出第一首個人單曲《E先生連環不幸事件》，歌曲席捲網絡，MV在YouTube至今已勁吸超過700萬點擊率，亦分別榮獲903專業推介、新城勁爆流行榜及Chill Club推介榜的冠軍歌殊榮，也令更多觀眾得悉這位人氣偶像原來音樂才華爆燈。相隔半年，Edan推出第二首單曲《小諧星》，今次更找來娜姐、彭秀慧及陸駿光參與拍攝MV。前晚，Edan在個人YouTube頻道上載MV的幕後花絮短片，披露拍攝時因工作排得密麻麻而嚴重缺乏睡眠，又要面對排山倒海的難題。

教女神彈琴勁Charm

Edan拍攝期間狂擦菠蘿包及紅豆冰，更摸肚大曬「三個月身孕」。（網上截圖）

　　一向瘦底的Edan於MV中奉旨擦餐飽，除了拍攝在茶餐廳食早餐鏡頭外，到達豪宅拍攝場地又喪食菠蘿包及飲紅豆冰，然後再與娜姐狂食港式街頭小食。不過，娜姐埋位拍攝試衫鏡頭前，發現Edan大快朵頤，即大喊︰「fitting（試衫）緊你食菠蘿包，有無搞錯呀！」Edan即自嘲︰「菠蘿包放題！」他更聲言不怕肥︰「成日話我太瘦嘛！」這位男神更乘機摸肚曬其「三個月的寶寶」肚腩仔，非常搞笑。MV中，飾演「毒男」鋼琴老師的Edan要單戀「大明星」娜姐，除了專業教對方彈琴，二人更落泳池濕身對望，認真浪漫。

Edan捉實娜姐玉手教彈琴，盡見暖男一面。（網上截圖）

Edan的髮型師（右）幫花姐按摩表現得似模似樣，更指花姐肌肉繃緊。（網上截圖）

　　拍攝落水鏡頭前，娜姐笑指「爵屎（Edan粉絲）」想看偶像除衫，Edan經理人黃慧君（花姐）亦搭嘴︰「除衫OK呀！」不過，Edan自知未夠料曬肌︰「唔好玩我啦，呢排無練！」Edan與娜姐拍落水戲前卻撞正一號風球兼暴雨，要呆等兩小時才能埋位，Edan忍不住自嘲遇上「E先生嘅不幸事件」。至於MV結尾的鋼琴獨奏部分，Edan亦有苦自己知，全因他極遲才收到琴譜，只能趁拍攝期間的空檔練習。此外，花絮短片中，Edan搞笑寸爆花姐行使權力，令自己的髮型師變身「骨妹」幫花姐按摩。他說︰「我哋嘅髮型師要做埋按摩師嘅工作，搵食艱難！」一班爵屎激讚偶像幾經艱辛完成MV，勸他保重身體；有網民亦讚MV拍得有feel，直指Edan已是他們心目中的大明星。