加入最愛專欄  收藏文章 

2020-01-24

沒有最差,只有更差

 

  Tina諗咗呢篇稿條題好耐,新正頭唔想講得咁負面,但面對住一發不可收拾嘅疫情,再加上見到就令人火滾嘅特區政府上上下下官員,用「沒有最差,只有更差」,已經係非常之厚道。

 

  想當年沙士襲港雖然Tina年紀唔算大,但都了解到呢種突如其來嘅病毒係好難應對,加上當時未有經驗,政府好多時都係見步行步,要怪亦怪唔到咁多。不過沙士奪去咗嘅寶貴生命,確實為整個社會帶來寶貴嘅經驗,上至政府下至市民,每人都可以行多一步去做防疫,但偏偏我哋咁有「作為」嘅特區政府,再一次展現管治缺失。

 

  特首林鄭喺危機一步一步爆發嘅時刻,佢人就飛咗去瑞士達沃斯,出席世界經濟論壇年會,今個星期二(1月21日)到達,大年初一(1月25日)先返港。而今次武漢疫情爆發點,正正係佢離開嘅一刻,睇返報道,香港喺1月20日公布,所有由武漢抵港嘅航班,旅客都要做健康申報,之後每日嘅疫情都越趨嚴峻,偏偏我哋嘅特首,唔選擇返香港坐鎮,由得政務司司長張建宗唔戴口罩咳住咁同傳媒講,「不希望大批人流到埗後聚於大堂填表」,所以當時決定高鐵旅客唔使申報。

 

  Ok,你顧住展現香港國際大都會嘅強項同優勢唔返香港,但你都有同團隊溝通應該點做卦?專家、食衛局有同你做匯報要你去做一啲重要決定卦?口岸檢疫措施進退失據以外,特區政府呢個星期所做嘅嘢基本上都係進退失據,畀隔岸嘅澳門遠遠拋離。當港人見到藥房賣一盒口罩炒得貴過港交所(00388)股價嘅時候,澳門居民可以用正常價確保買得到口罩;當港人見到香港好似無掩雞籠任武漢居民入境嘅時候,澳門特首就得到珠海保證發燒嘅旅客唔會入到境,試問一下,港人又點會信得過呢個特區政府可以帶領香港走出幽谷?

 

  求人不如求己,唔好寄望呢個只有更差嘅政府喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多立會透視鏡文章
你可能感興趣
#立法會 #防疫 #武漢肺炎 #澳門 #林鄭月娥 #張建宗 #口罩 #發燒
編輯推介
即時報價
全文搜索
Search
最近搜看
新型肺炎
財政預算案
More
Share